Swapo, ongundu ndjoka hayi tula miilonga iinakugwanithwa, ongundu ndjoka yi hole ombili, uundemokoli naantu.
Dhoka oohapu dha popiwa kOmupevi Minista gwIikwameni nOmatembu, Erastus Uutoni, pethimno a popitha oshigongi shoSwapo shoka sha ningilwa molukanda lwaEvululuko mOshakati mOsoondaha ya piti.
Okwa popi kutya ethimbo lyokuninga omwahwameko gomahogololo olyo ethimbo lyokutala kiilonga mbyoka ya longwa kookansela oshowo omalelo goondoloopa muule womimvo ntano dhoka ya kala miilonga.
"Ope na aantu yamwe mboka ye wete omayambukepo ihe omayambukepo ihaga ilongo gogene. Swapo oye omukwateli komeho gwomayambukepo ngoka , nuuna mwa gandja oshinakugwanithwa kuSwapo nena otamu ka mona iizemo," uutoni ta ti.
Sho a popi kombinga yekondjitho lyoluhepo, Uutoni okwa popi kutya epangelo olyiitulamo mokondjitha oluhepo mokati kaakwashigwana naashoka osho sha etithwa li tule miilonga oshikondo shoka sha nuninwa okulwitha oluhepo.
"Onga oonkambadhala dhokulwitha oluhepo otwa gwedhele oshikwiila shaakulupe okuza pooN$600 okuya N$1 000, nooN$200 otadhi gwedhako momvula twa taalela."
Okwa popi woo kombinga yompangela dhepangelo okuhulitha po iifuta yooskola okuza poondondo dhopevi sigo opoondondo dhopombanda.
Omupevi Minista okwa popi woo kombinga yomadhipagathano ngoka taga ningilwathana moshigwana , nomiyonena dhopaukashikekookantu dhoka tadhi ningwa.
"Inashi pumbiwa okulonga uuhwapindi nokudhipaga omuntu ngele ina hala we okukala nangoye mohole. Inatu mangulula oshilongo shika opo andola Aanamibia ya kale taya idhipaga."
Sho a popi kombinga yoshikumungu shaanyasha mboka ya valelwa mekondjo, Uutoni okwa ekelehi omaindilo ngoka taga ningwa kaanyasha mboka ta popi kutya omakwatho itaga pewa owala aantu yamwe. Okwa popi kutya epangelo lyaNamibia oli lilepo owala aantu ayehe na kali lilepo owala aantu yamwe.
Okwa pula aayambidhidhi yoSwapo niilyo yawo opo ya ka hogolole oSwapo momahogololo ngoka taga ningwa momasiku 27, opo oshilongo shi tsikile nokuyambulwapo.
Nonando Swapo ota kondjithwa miikandjohogololo ya thika pu ine oshowo momalelo goondolopa gatatu mOshitopolwa shaShana, Oshakati, Ondangwa nOngwediva, aahogololwa yoSwapo itaya kondjithwa nenge kapu na ongundu yompilameno ndjoka ya holola ohokwe okukutha ombinga medhigathano lyomahogololo miikandjohogololo ngaashi, Okatana, Uuvudhiya, Ompundja, Okatjali, Uukwiyuushona, Ondangwa Rural nOkaku.
PLACIDO HILUKILWA