Omukwashigwana ngoka okwa popi kutya okwa dhenga kaapolisi yatatu mboka kaya li miilonga ethimbo ndyoka. Aanambelewa mboka oya ponokele omukwashigwana ngoka sha landula oontamanana dhi na sha niimaliwa.
Johannes Gerson Kandume, 38, okwa popi kutya aapolisi mboka oye mu dhenge onguloshi yEtitano lyopotundi onti-22:00 nokonima oye mu fala kokapangelogona opo a ka pangwe. Pahapu dhaKandume, onguloshi ndjoka okwa zi mo megumbo opo a ka konge kuume ke, ngoka e na oondjo dhe. Okwa popi kutya okwa futila omboloka omulumentu ngoka opo a mangululwe okuza mondjeedhililo.
Kandume okwa popi kutya oya tsu kumwe nakuume ke opo ya tsakanene pondunda yomanwino yontumba ihe sho athiki pehala ndyoka okwa a dha kuume ke ngoka a kolwa nale. Okwa popi kutya kuume ke ngoka okwe mu lombwele kutya ina hala okumu pa iimaliwa ye. Oya tameke taya tamanana nakuume ke okwa tameke okumu dhenge. Okwa popi kutya okwa yamukula noongonyo nokudhenga kuume ke, ihe aanambelewa yatatu yopolisi mboka ya li pehala ndyoka oye mu ponokele.
“Aanambelewa mboka oya ponokelendje na oya tameke taya dhengendje nokuthangandje. Ina ya pula ndje sha oya tameke owala taya dhengendje kehe pamwe,” Kandume ta ti. “Onda idhenge pevi ihe mboka oya tsikile nokudhengandje.”
Omulumentu ngoka okwa popi kutya aanambelewa mboka oye mu fala kokaklinika konima sho ya mono kutya oye mu monitha oshiponga.
“Oya falandje koshipangelo. Oshipala shandje nomutse ogwa li gwa zinda. Kaya li ya hala ndi ye kopolisi molwaashoka oyo ya dhengendje. Onda kambadhala okuninga oshipotha mOlyomakaya ihe aapolisi mboka ya li miilonga oya tindi.”
Aakwanezimo nookume mboka ya li po sho oshiningwanima shoka sha ningwa oha holoka okuuva nayi kwawo na oya pula opo aanambelewa mboka ya longo omuyonena ngoka ya pangulwe.
“Otwa loloka aantu mboka ya pumbwa okutugamena oyo taya ikuthile oompango momake gawo. Aapolisi yaKamanjab oyiigilila okudhenga aakwashigwana ihe kape na shoka hashi ningwapo. Onkalo ndjika itatu yi idhidhimikile wee,” Petrina Kandume ta ti.
Komanda gwosasiyona yOpolisi moKamanjab, Raymond De Klerk okwa popi kutya ka li mo mondoolopa pethimbo oshiningwanima shoka sha ningwa, na okwa mono uuyelele kombinga yoshiningwanima shoka na okwa pula Kandume opo a shune kosasiyona ye a ka tulemo oshipotha.
“Itandi vulu okupopya oshindji pethimbo ndika, ihe ehokololo ndyoka onde li uva. Otandi ka longa iilonga yandje nokukwathela Kandume.Kandi na we uuyele wumwe waanambelewa yopolisi ya dhenga aakwashigwana,” De Klerk ta ti.
KAKUNAWE SHINANA
Category: