Hamutenya, ngoka a totopo oRDP mo-2007, okwa dhigipo iikwapolotika kuyele nuumvo na okwa wayimine oSwapo muAguste nuumvo.
Eshuno lye koSwapo olya landulwa kuyamwe yomaatotipo yongundu ndjoka mboka nayo ya shuna koSwapo.
Mboka oya tumbulwa komadhina kutya Phillemon Kanime, Magnus Nangombe, Festus Naholo naShapwa Kaukungwa.
"Ongaashi mushi shi kutya yamwe mboka ya dhigipo ongundu na oye li aambanda oya li iilyo naatotipo yongundu ndjika, na ka twali tushi shi ngele otaya vulu okuninga shoka ya ningi," Nambinga ta ti.
Nambinga okwa popi kutya mboka ya dhigipo ongundu kaya li shili yiitulamo nomitima dhuudha momilandu dhoRDP dhoka dhili okuhwahwameka uundemokoli, etopolo lyeliko dhoonzo dhopaushitwe shithike pamwe, eyambulepo lyelongo nuundjolowele oshowo okutotapo oompito dhiilonga dhaayehe. Nambinga okwa popi kutya mboka ya thigipo ongundu oya li owala ya yi kongundu ndjoka nenge oye yi totopo nomalalakano gokwiiyambapaleka nokumona omauwanawa gawo yene na kashi shi shili okukwathela aakwashigwana.
Okwa popi kutya mboka ya thigipo ongundu inaya kala taya kutha ombinga miikwapolotika okutameka momvula 2013 onkene eshuno lyawo koSwapo kali shi ekanitho kongundu yoRDP.
Nambinga okwa popi kutya Swapo okwa kala ta tala omeho aayambidhidhi yoRDP molwaashoka okushi shi kutya RDP oku li eshongo enene kuSwapo.
"Omolwashike to dhigipo ongundu ndjoka ya totwa nelalakano lyokukondjitha uulingilingi niilonga yilwe yanyata nokuwayimina ongundu ndjoka ngoye wa li wa thigipo mo-2007 molwaashoka owa mono kutya oya kanitha omalalakano gayo."
Nambinga okwa ningi omauvaneko miipathi yiikundaneki kutya ye ke na esiku a shune koSwapo.
Okwa popi kutya oRDP itayi kanitha omalalakano gawo nekalepo lyawo.
KENYA KAMBOWE