Konima yoomwedhi dha thika pomulongo sha landula edhipago lyomulongwapangi , Martha Ilonga ngoka adhipagwa kopolisi kuyele nuumvo, okwa lopotwa kutya omunambelewa gumwe gwopolisi ota tamanekelwa edhipago lye.Ilonga omunamimvo 21, okwa yahwa momasiku 12 gaFebruali oshiningwanima sho sha etitha omahokololo ogendji ga yooloka. Omupopiliko gwOpolisi yaNamibia Edwin Kanguatjivi okwa koleke koshifokundaneki shoNamibian Sun kutya omunambelewa gwopolisi okwa tegelelewa a holoke komeho yompangu moKatutura momasiku 23 gaNovemba ta tamanekelwa oshipotha shedhipago lyaIlonga.
Muule woomwedhi dha piti okwa holoka omalimbililo kombinga yoshipotha shoka. Ofamili oya popi kutya opolisi pamwe nOmupanguli-Ndjai otaya holeke omauyelele. Omupanguli-Ndjai, Martha Imalwa okwa tindi okugandja uuyelele kiikundaneki kombinga yetokolo ndjoka aningi sha landula sho epeko lyoshipotha shoka ndyoka lya falwa kombelewa ye.
Sigo oshiwike sha piti, ofamili yaIlonga kayi na uuyelele ngele ope na ngoka ta pangulilwa edhipago lyomuholike gwawo sho opolisi ya li yapopi nale kutya edhipago ndyoka olyi li oshiponga ano inali ningilwa owina. Omanga epangulo inali kolekwa koshikundnaeki shika, ofamili oya holola omaiyuvo kutya omunambelewa gwopolisi ngoka adhipaga Ilonga okwa za miilonga na ke shiwike mpoka e li.
Sho a ningwa naye oonkundatha koshikundaneki shoNamibian Sun okuzilila kOnooli, omumwayinagona gwaIlonga, Selma Shaanika, okwa popi kutya konima sho ya shangele ombapila Omukuluntu gwEtanga lyOpolisi, Sebastian Ndeitunga taya pula uuyelele kombinga yomakonaakono, oya hiwa komutumba ngoka gwa ningilwa poombelelwa oonene dhOpolisi moshilandopangelo omwedhi gwa piti.
"Otwa tsakanene nOmupeha kOmufala Mazila naanambelewa yalwe. Oye tu lombwele kutya omunambelewa ngoka ta tamanekelwa edhipago lyaMartha okwiikutha miilonga konima sho a mono kutya ota ningilwa omakonaakono na otashi vulika a ka tulwe miipandeko na keshiwike mpoka e li ngashiingeyi," Shaanika ta ti.
Shaanika okwa popi woo kutya yinakulu yaIlonga okwa haluka unene keso lyomutekulu na ota tindi okutaambako onkalo.
Omalimbililo
Konima yoshiningwanima shoka, oNamibian Sun oya li ya ningile omapulaapulo omuhingi gwohauto moka mwa li Ilonga pethimbo sho a yahwa. Omunamimvo, 19, Shuuveni Titus ngoka a li ta hingi ohauto ndjoka yuumbwa kopolisi okwa popi kutya pethimbo ndyoka okwa li woo e li nomufaalelwa gumwe ngoka a yakula ongodhi okuza ku kuume ke e li moHavana ngoka aniwa a pumbwa omahooli.
Sho ya dhiki, omuntu ngoka pumbwa omahooli okwa li nale e li naanambelewa yamwe yopolisi.
Titus okwa popi kutya okwa zimo mohauto ndjoka a li ta hingi opo a ka pule kutya uupyakadhi owuli peni, ihe okwa lombwelwa kaanambelewa yopolisi opo a dhigepo ehala ndyoka.
Okwa ti, okwa hingi owala oshinano oshishona okuza pehala ndyoka na okwa uvu ondjembo ya topa. Sho a tala konima ye okwa mono Martha a yahwa nekende lyohauto ye lyokonima lya tatuka.
Nonando ongaaka olopota ndjoka ya pitithwa kopolisi oya popi kutya, aanambelewa yopolisi oya li taya konaakona oshipotha shohauto ndjoka oya helula omuntu ngoka opolisi ya dhimbulula kutya oku li omufekelwa moshipotha shomuyeka kwahomatiwa. Oya popi kutya opolisi oya tula miipandeko omulumentu ngoka a helulwa mohauto ndjoka na oya dhimbulula woo kutya nakuhinga ohauto naye oku li omufekelwa ihe ohauto ndjoka oya yi ontuku nopolisi oya umbu nelalakano lyokulondodha opo omuhingi ngoka a thikame. Sho ohauto ndjoka inayi kankama, opolisi oya yaha ketayiyela lyohauto naashoka osha etitha oholo yimwe yi yahe Martha ngoka a li a kuutumba koshipundi shokonima.
GORDON JOSEPH