Komanda nale gwOpolisi yaShana, Ndahangwapo Kashihakumwa okwa lopotwa ta longele ehangano ekeeleli lyomaliko mOnooli yoshilongo pauyelele wa monikapo koshikundanekifo shoNamibian Sun.
Kashihakumwa okwa wayimine ehangano lyedhina Shilimela Security Company konima yoomwedhi ndatu sho a tseyitha e zo lye miilonga nokuya moshipundi shevululuko kuyele, etseyitho ndyoka lya li lya halutha oyendji na okwa popi kutya okwa hala a ka sile ofamili ye oshipwiyu.
Omukomeho gwoShilimela Security Company , Banda Shilimela, sho a ningilwa omapulaapulo okwa popi kutya ye okwa ulike owala komufala nale opo a longe nomilandu, omadheulo niilonga yehangano ndyoka. “Kashihakumwa okwa li ta longo nuudhiginini pethimbo a li komanda gwopolisi mOshana, onkene sho a yi moshipundi shevululuko osha ningi ompito yandje opo ndi mu konge,” Shilimela ta ti.
“Okuli gumwe gwomaantu mboka nda tala koshipala shawo pethimbo nda wayimine etanga lyoPeople’s Liberation Army of Namibia muupongekwa. Aantu ngaashi ye oyo omatompelo sho nde shi pondola monkalamwenyo nena. Kandi shi kutya omolwashike pe na okukala uupyakadhi na omolwashike Kahihakumwa ita vulu okulongela Shilimela. Ota futwa na ita longo we onga komanda gwopolisi.”
Sho a pulwa, Kashihakumwa okwa popi kutya Shilimela okwe mu pula opo e mu yambidhidhe mpaka naapeyaka.
“Natango onda pyakudhukwa okulonga nokugandja egameno moshilongo shoka ngame nda kondjele emanguluko lyasho na itandi vulu owala okulonga onga komanda yopolisi ihe otandi vulu okulonga poompito dha yooloka. Otandi longele Shililema sigo oDecemba. Aantu ohaya yi miipundi yevululuko kehe ethimbo ihe itashi ti ngele omuntu tayi moshipundi shevululuko otaka kala owala kegumbo a mwena. Sho nda yi moshipundi shevululuko onda popi kutya otandi ka kala nofamili yandje nokutala kutya oshike ishewe tandi vulu okuninga. Onda longa oomvula odhindji na onda yambidhidha kombili nemanguluko lyoshilongo shika. Sho nda yi moshipundi shevululuko aantu yamwe oye wete kutya oya pumbwa ekwatho lyandje naShilimela oye gumwe gomuwo.”
KAKUNAWE SHINANA
