Ookastoma dhaMTC otadhi ka shunithilwa iimaliwa yadho, konima sho ehangano ndyoka lyomakwatathano lya tseyitha mEtiyali kutya otali hulitha po omahwahwameko gawo gokunana ookastoma dhawo ooN$2 mepingakanitho lyooMB 10.
Momukanda gwiikundaneki ngoka gwa pitithwa kehangano ndyoka, Omukomeho gwOonzo dhoPauntu nOmauyelele mehangano ndyoka Tim Ekandjo, okwa tseyitha kutya otaya hulitha po omahwahwameko ngoka ongulohi yEtiyali, sha landula omanyenyeto goshigwana oshowo ehangano lyoCommunications Regulatory Authority of Namibia (Cran) ndyoka lya idhopo mo.
“MTC oku uvite kutya omahwahwameko ge ngoka inaga pandika, oshowo okwaahauvako omahwahwameko ngoka, onkene okwa tokola opo a hulithepo omahwahwameko ngoka,” Ekandjo ta ti.
Okwa gwedhako kutya etokolo ndyoka olya ningwa sha landula omukanda ngoka gwa shangwa koCran oshiwike sha piti.
Omahwahwameko ngoka gaMTC oga tamekele momasiku 12 gaDesemba 2014, na oga popilwa kehangano ndyoka kutya oga nuninwa opo ookastoma dhawo kadhi kanithe iimaliwa yawo, nokwiikalekela ooN$2 uuna taya longitha oointernet koongodhi dhawo dhoshinanena.
Ekandjo okwa popi kutya elongitho lyoongodhi dhoshinanena moshilongo olya londa pombanda noopresenda 6 omvula ya piti, ihe elongitho lyointernet kokastoma kehe olya londa noopresenda 126 methimbo lya faathana.
“Ina tu haluka molwaashoka otwa kala twa tegelela nale eyo pombanda ndyoka naashoka osho sha etitha tu tule miilonga omukalo ngoka tagu yambidhidha ookastoma dhetu,” Ekandjo ta ti.
Nonando ongaaka omahwahwameko ngoka oga kala taga nyanwa kookastoma miikundaneki nokomakwatathano gopainternet konima nkene ga tameke, sha etitha ehangano lyi gandje ompito kwaamboka inaya hala okunanwa opo yiikuthemo momahwahwameko.
Sho a pataneke nokwaahapopila omahwahwameko ngoka , Cran okwa popi moshiwike sha piti kutya MTC ota yi pondje Oveta yOmakwatathano molwaashoka ina tseyithila ehangano ndyoka kombinga yomahwahwameko ge, na ota thiminike ookastoma dhe dhi kuthe ombinga momakwatathano ngoka.
Cran okwati, ota ningi omakonaakono na otaka tokola oshizemo muule wethimbo efupi.
MTC ohela okwa tsu natango omuthindo kutya omahwahwameko ngoka ogo dhingi kookastoma dhe.
Ekandjo okwa popi kutya ookastoma dhawo adhihe ndhoka dha nanwa ooN$2 pokati komasiku 12 gaDesemba sigo ongulohi yEtiyali otadhi ka shunithilwa iimaliwa yadho.
OVENDUKA DENVER ISAACS