Etanga lyEgameno olya tamekitha eshangitho lyaakwaita moshilongo ashihe mboka ka ye na omagumbo, omanga natango oshikondo shoka sha tindi kutya shoka ka shi li oshitopolwa shomulandu gwetopolo lyevi moshilongo.
Shika osha kolekwa kOmupopiliko gwOshikondo shEgameno moNamibia Colonel Monica Sheya, ngoka a popi woo kutya Uuministeli wEvi owo owala wu na oshinakugwanithwa sho ku topola evi .
Momukanda ngoka gwa pitithwa koshikondo shoka, na ogwa tumwinwa ookomanda dhiitopolwa ayihe tayi adhika mOshikondo shEgameno, NDF Chief Lieutenant-General John Mutwa, okwa gandja elombwelo opo aakwaita ayehe mboka kaye na omagumbo ya shangithwe opo yamone oompito dhokumona omagumbo.
Momukanda moka, Mutwa okwa holola kutya eyo pombanda lyomuyalu gwaakwaita moshikondo shawo, otali yi woo moshipala omilandu dhoka dha tulwa miilonga moshikondo mwa kwatelwa omulandu gwomalukalwa.
“Omilandu dhi na sha nomayambulepo moshikondo otadhi ende kashona noonkondo onkene itadhi kwathele sha. Omolwa onkalo ndjoka ka tu na omahala gokukala aanandjokana nenge omalukalwa gopamuthika.”
Pahapu dhomukomeho gwoshikondo shoka, aakwaita oya tokola okuhiila omalukalwa momidhingoloko ndhoka taya longele, omanga yamwe haya zi moombashu.
Okwa gwedha po kutya okwa totwa okomitiye ndjoka tayi ka tala konkalo yompumbwe yomagumbo nenge omalukalwa ndjoka ya guma noonkondo aakwaita.
Omukanda ngoka ogwa holola kutya iilyo yetanga lyEgameno mbyoka kayi na omagumbo na yi ishangithe yo tayi hogolola woo oondolopa moka yahala mu kale omagumbo gawo.
Sheya okwati: “Otwa pumbwa omagumbo goofamili noshowo. Kehe gumwe okwa pumbwa ehala lyokuza nonkalamwenyo yaakwaita ka yi shi kutya okukala taya zi mookamba. Ope na ethimbo lyawo lyokuthiga po iilonga. Onkene oya pumbwa omahal gokuza. Ita tu shangitha aantu evi.”
Sheya okwa popi ngaaka a yamukula komapopyo, gomunapolotika gwoSwapo Job Amupanda, ngoka a li kuthwa miilonga kutya NDF ota shangitha aakwaita mboka ka ye na evi.
Amupanda okwa kuthwa miilonga kOngundu yoSwapo, konima sho iikuthile oshitopolwa shevi moKleine Kuppe omvula ya piti.
Konima okwa unganeke egandjo lyomaindilo gevi kumuni gwaVenduka , omanga ina taalela ishewe uuthemba wokukwata oohi, nevi kaakwaita.
Amupanda nonando okwa popi kutya oshikondo shoka otashi gandja evi kiilyo yasho, okwa popi kutya osha pewa elombwelo opo shi tinde omapopyo ge gandjo lyevi kaakwaita.
“Ongele shapo ka ye shi shoka tashi inyenge mookamba dhawo nenge ya lombwelwa opo ya tinde, naashoka otashi kaya moshipala omulandu aguhe,” Amupanda ta ti.
“Ondi na uuyelele nde wu pewa kaakwaita aanyasha mookamba dha yooloka moshilongo na onde shi koleke ngame mwene. Oya shangithwa mookamba dhawo opo yapewe evi.”
OVENDUKA ELVIS MURARANGANDA