Oshipotha sheyonagulo lyomaliko osha patululwa kOmusita, Abraham Petrus, nOpolisi yaKankolo mEtitano lya piti.
Ehanagulepo lyongeleka ndoka olya ningwa sha landula oshigongi sha ningila poskola yaKankolo shoka sha utha opo ongeleka ndjoka yi na iilyo ya thika po-40 yiidhile omiyelo molwaashoka ohayi piyaganeke aanaskola opo ya vule okwiilonga molwaashoka ohaya kala owala omausiku agehe kongeleka ndjoka.
Aalongi oya popi kutya ongeleka ndjoka otayi yi moshipala iilonga yaalongi molwaashoka aanaskola mboka haya kala kongeleka ndjoka ihaya itula mo miilonga yawo yoskola.
Ota ku popiwa kutya aanaskola yamwe ohaya lala pongeleka na ohaya hiti mongeleka ndjoka omausiku na ohaya piyaganeke aanaskola mboka yahala okukotha.
Nonando ongaaka Omusita Petrus okwa tindi omapopyo ngoka.
“Aalongi naavali otaya popi iifundja. Ohatu ningi owala OmalongeloKalunga getu momahuliloshiwike. Ohatu pitika owala aanona ya wayimine OmalongeloKalunga getu uuna yeli naakuluntu,” Petrus ta ti.
Okwa popi kutya mboka taya lundile ongeleka yawo iilyo yongeleka yoEvangelical Lutheran Church in Namibia (Elcin) mboka ye na uutile kutya otashi vulika ya kanithe iilyo yawo omolwa ongeleka ndjoka.
Kombinga yomapopyo kutya ongeleka ndjoka otayi e ta omaupyakadhi, Petrus okwa popi kutya ongeleka oya fa oshipangelo na ihayi e ta omaupyakadhi ihe ohayi kandulapo omaupyakadhi.
Okwa popi kutya aavali mboka taya yambidhidha epato lyongeleka ndjoka oya hekwa kaalongiskola molwaashoka aalongiskola oyo ya kwatele komeho omutumba ngoka naavali oya itaala kehe shimwe shoka tashi popiwa.
Omutumba ngoka ogwa kaliwa woo kelenga enene lyElelo lyaNdonga, na okuli Ngoloneya nale gwOshitopolwa shaShitoko, Vilho Kamanya ngoka a tsu kumwe aniwa netokolo lyaavali opo ongeleka ndjoka yiidhilwe molwaashoka aniwa Elelo lyaNdonga nalyo itali popile iinyangadhalwa mbyoka tayi yi moshipala elongo.
Omukonaakoni gwElongo mOshikandjo shaNyuulaye, Abraham Nafine naye oka kala momutumba ngoka, ihe Petrus okwe mu pandula molwaashoka ina gama ombinga na okwa holola kutya oshilalakanenwa shUuministeli okundungika aanona pwaahena ondjoolola yoongeleka dhomahogololo gawo.
Omusita okwa popi kutya inaya pewa ompito opo ya gandje ombinga yawo yehokololo. “Onda pewa owala oominute 4 ndi popye ihe ka pe na ngoka apulakenendje.”
Petrus oku li omukalimo gwomolukanda lyUupindi mOshakati na okwa shuna kegumbo konima yoshigongi shoka sha ningwa ihe okwa shuna meendelelo kOnkankolo mEtitano konima sho a tseyithilwa kutya ongeleka oya hanagulwapo.
“Mpoka pwa li ongeleka yetu onda adhapo owala iiti, iipeleki oya kuthwa po. Mboka ya ningi ngaaka oye shiwike na onda patulula nale oshipotha sheyonagulo lyomaliko kopolisi.”
Elenga Kamanya nenge omukonaakoni gwElongo Nafine inaya vula okumonika opo ya vule okupopya sha kombinga yehokololo ndyoka.
OSHAKATI PLACIDO HILUKILWA