Omalundilathano oga tameke mOngundu yoDTA shalandula sho kwa kuthwa miilonga amushanga-ndjai nale Vincent Kanyetu, oshowo aakwatakanithi yiitopolwa, Boniface Kashera naReinhilde Kudumo.
Omalundilo ngoka ongaashi kutya omuleli gwongundu ndjoka, McHenry Venaani , ota lele ongundu okuzilila moseti ye na ota lundululile ongundu mehangano lye lyomapaumwene nokuhwahwameka uukwamuhoko mokati kiilyo mbyoka yi li omuhoko gwAaherero oshowo aakwashigwana yomihoko dhilwe, na ota talako owala unene iilyo mbyoka iipe.
Kanyetu ngoka a li a kutha ombinga moshipotha shuulingilingi na okwa monika ondjo kongundu moshipotha shoku landitha po etungo lyongundu mOrundu mekwathelo lyaKashera naKudumo oye a popi ngaaka.
Venaani okwa pula kutya omolwashike Kanyetu ta popi owala ngashiingeyi konima sho ongundu ya tokola oku mu kutha manga miilonga na oye mu indika opo ka longithe edhina lyongundu muule woomvula ntano dhi li komeho.
Kanyetu okwa lombwele oNamibian Sun kutya okwa li ta kwathele Venaani opo a vule okusinda nomudhengamo momahogololo guupresidende wongundu yawo, Katuutire Kaura mo-2013.
“Okwa li a hala okuya koSwapo nenge okutota po ongundu. Ka tu shi ngele okwa li ngaa taka sinda Kaura ihe opwa li oompangela kutya ngele ina sindana ota tu totopo ongundu. Okwa li woo a hala okuya kongundu yoSwapo nokuka ehela ompito kOmupresidende nale Hifikepunye Pohamba ihe ngame onde mu keeleleko na onde mu uvanekele kutya otandi ka kashilipaleka kutya okwa sindana,” Kanyetu ta ti.
Kanyetu okwa popi kutya oDTA itayi ka sindanapo oshipundi shongundu yompilameno yopambelewa momahogololo gomvula -2017.
Kanyetu natango okwa popi woo kutya okwiikutha miilonga yemwene oshiwike sha piti, na okwa pula kutya omolwashike ongundu ya tseyitha kutya okwa kuthwa miilonga.
Pauyelele we, okwa popi kutya okwiikutha miilonga pamwe niilyo yilwe o-250.
Venaani okwa ekelehi omapopyo gaKanyetu kutya okwiikutha miilonga.
“Ngele ota popi kutya okwiikutha miilonga yemwene omolwashike ineshi tseyitha miikundaneki. Ota fundju ina ikutha yemwene miilonga,” Venaani ta ti.
“Kanyetu okwa hala okupopya kutya okwa simana unene mongundu na okuna aalanduli ihe oshili ooshoka kutya okwa kala owala e na elago molwaashoka okwali Amushanga-Ndjai uuna tayi otayi owala naalanduli 250. Ngele mboka oye li aakwanezimo ye nena ndyoka ehogololo lye ihe ngame itandi pitika uulingilingi mongundu yetu molwaashoka owala owuna aalanduli nena owa hala oku yaka omaliko gongundu.”
Venaani okwa popi kutya oshipotha shaKanyetu osha yela kutya uulingilingi moka a zimine ondjo kutya okwa landitha po ombelewa yongundu sha etitha ongundu yi kanithe omuyalu gwiimaliwa gwa thika pomiliyona 1.
“Kanyetu okwa longo uulingilingi uunene mboka inawu monikamo nale mongundu. Otwa mona aantu taya yaka po iihauto nooindjina dhiihauto yongundu ihe inatu mona nale onkalo yaaleli taya landitha po omaliko gongundu.”
Kombinga yompangela okutota po ongundu tayi ithanwa “Orange party” niilyo yimwe yoSwapo okwa popi kutya eitulemo lyongundu yoDTA itali konenenwa.
“Ngele ondali nda sindika, oyo yali aaleli aanyasha mboka ya kala taya ti Venaani totapo ongundu yoye ihe ngame onda tindi molwaashoka onda itaala muudemokoli. Uuna nda sindika nena itashi ti kutya natango ngula otandi sindika.”
Okwa gwedha po kutya: “Kanyetu okuume kandje ihe oompango oompango owala. Okwa li ta dhilaadhila kutya molwaashoka okuli kuume kandje nena otandi mu gamene ihe ngame otandi gamene owala aantu pamulandu nomondjila.”
Ekutho miilonga lyaKanyetu otali utha kutya ita kutha ombinga miinyangadhalwa yongundu muule woomvula ntano dhili komeho.
Egeelo ndyoka olya pewa woo Kashera ngoka a li omukwatakanithi gwOngundu yoDTA moKavango West.
Kudumo, ngoka a li omukwatakanithi gwOshitopolwa shaKavango okwa pewa egeelo lyoomwedhi hamano na otashi vulika ashune pehala lye uuna egeelo lya lya pu.
OVENDUKA ELVIS MURARANGANDA