Aanangeshefa yomondoolopa tayi adhika mOnooli yoshilongo mOshikango oya holola okuuva nayi kwawo kutya etsokumwe lyepingakanitho lyiimaliwa yaNamibia naAngola ndyoka lya tulwa miilonga oomwedhi mbali dha piti otali dhipaga ongeshefa yawo, omolwa ondjele yepingakanitho yiimaliwa mbyoka ndjoka ya londo pombanda sigo opooprersenda 40 sha landula nkene epingakanitho lyiimaliwa mbyoka lya tulwa miilonga oomwedhi mbali dha piti.
Ombaanga yaNamibia oya li ya tseyitha pambelewa kutya ondjele yOdola yimwe yaNamibia oyi na ongushu yooKwanza dhaAngola 10.8 monena ondjele ndjoka oya yi sigo opooKwanza 15.8.
Oshitayi shEhangano lyAanangeshefa mOnooli yoshilongo ano
(Namibia Chamber of Commerce and Industry) oya pula opo Ombaanga yaNamibia opo yi kwashilipaleke ekalepo lyondjele ndjoka ya li ya uvathanwa naAngola.
“Konima owala yoomwedhi mbali sho epingakanitho ndyoka lya tulwa miilonga aantu otaya longitha nale kehe uunkundi mboka tawu a dhika metsokumwe ndyoka naanangeshefa yaNamibia otaya nana nonandatu okumona omauwanawa ngoka ga nuninwa etsokumwe ndyoka,” Omunashipundi gwoNCCI mOnooli, Thomas Koneka Iindji ta ti.
Ope na woo uutile mokati kaanangeshefa kutya, epangelo lyaAngola otashi vulika li ka kuthe oonkondo etsokumwe ndyoka omolwa aapingakanithi yiimaliwa mbyoka Aanamibia.
Aanangeshefa otaya gandja woo uusama kutya Angola okwa yi metsokumwe lyoludhi ndoka naChina oshiwike sha piti, ndyoka lya utha opo iimaliwa yaChina yi vule okukala tayi taambwa moAngola.
“Ope na omalimbililo ogendji. Ka pe na shoka sha yela ihe ita tu vulu okupopya oshindji molwaashoka otwa tegelela okuuva okuza kOmbaanga yaNamibia molwaashoka oya popi kutya otaya ka gandja etseyitho oshiwike shika,” omunangeshefa
Raed Hijazi, ngoka e li omunashipundi gwaanangeshefa yomOshikango ta ti.
Etsokumwe lyopashimaliwa pokati kaChina naAngola olya nuninwa opo shi ninge oshipu opo Angola a vule okukutha iilandomwa okuza koChina opo woo Angola a vule okutuma momalanditho gaChina iilandithomwa ye. Angola okwa kala ha landa iilandomwa ye pondje yoshilongo pakulongitha iimaliwa yaUS ihe ondjele yiimaliwa yopondje oya gu pevi omolwa eshuno pevi lyondando yomahooli muuyuni.
Omukomeho gwOmakwatathano nOmayambulepo gwOshikondo shoPaiyemo mOmbaanga yaNamibia,
, Ndangi Katoma, okwa popi kutya nonando ombaanga yawo ka yi li ponkatu yokupopya kombinga yekwatathano nomatsokumwe gopaimaliwa pokati kaAngola niilongo yilwe, omatsokumwe ngoka itaga ka ya moshipala etsokumwe ndyoka lya shanwa kOmbaanga yaNamibia noBanco Nacional De Angola.
Katoma okwa koleke kutya nonando ope oohandimwe naanangeshefa mboka taya ningi epingakanitho lyiimaliwa yiilongo mbika iyali pakuya pondje oompango dhetsokumwe omakonaakono otaga ningwa.
Katoma okwa popi woo kombinga yomaiyuvo ogendji ngoka ga hololwa sha landula nkene kwa tulwa miilonga etsokumwe ndyoka kiilongo mbika iyali noshigwana otashi ka tseyithilwa uuna omakonaakono ngoka taga ningwa ga manithwa.
OVENDUKA KAKUNAWE SHINANA
Category: