Omunyasha omukiintu okwa ningi oshihakanwa shomukwatinkonga sha landula sho omuukintu ngoka a yamukula ketseyitho lya ningwa moradio kutya omulumentu ngoka ota kongo omukiintu gwokuya naye mohole noku yambidhidha pashimaliwa mOlyomakaya.
Metumwalaka ndyoka lya leshwa koradio yoBase FM, omulumentu gwedhina Denzel ngoka a popi kutya oku na oomvula 21, okwa popi kutya ota kongo omukadhona ihe andola nakale omunaskola.
Omukadhona gwoomvula 17 ngoka edhina lye itali vulu okutumbulwa, okwa yamukula ketseyitho ndyoka paku dhengela ongodhi ndjoka ya li ya gandjwa.
Okwa zimine okutsakanena naDenzel ngoka e mu pukulula kombashu ye moHavana moKatutura.
“Onda li nda kumwa noonkondo sho nda mono omulumenu ngoka, okwa li ta monika omukuluntu noonkondo okuyeleka noomvula dhoka a popi. Okwa popi kutya nandi ye mondunda ye opo tu vule okupopya,” naku ninga oshihakanwa ta ti.
“Okwa tameke ta kwatandje ngame onda pula opo a ethendje . Okwa thigindje mombashu ye na okwa pata omuyelo nokuya pondje. Okwa galuka ta lombwele ndje kutya ina hala okukondjitha ndje opo tu momilalo naye ihe okwa hala owala okukwatandje opo iiyuvuthe nawa. Molwaashoka onda li nda tila onda pitika a lale nangame. Okwa lombwelendje kutya inandi lombwela omuntu kutya otwa lala naye molwaashoka otaka piyaganeka onkalamwenyo yandje ngele onde shi popi. Okwa ti otaka popya nokulombwela aantu kutya onda lala naye omanga ta lumbu nombuto yoHIV.”
Omukadhona ngoka okwa popi kutya okwa dhengele koradio ndjoka na okwa popi nomuwiliki gwooprogramma Otto Kapuka, na okwe mu lombwele kombinga yaashoka sha holokapo oshowo Denzel ngoka akala temu dhengele oongodhi kutya na shune kombashu ye.
“Okwa dhenge miipathi yetu na okwa ningile omatilitho okakadhona hoka kutya ngele inakashuna kombashu ye mOsoondaha nena otapu kala iilanduli,” Kapuka ta ti.
“Otwa dhengele Opolisi yaNamibia oshowo Opolisi yOshilandopangelo, na otwa tula okakadhona hoka motaxi na otwe ka landula sigo okombashu yomulumentu ngoka. Sho twa yi mombashu ye ka mwali iikulya , iikutu, nenge ombete na oha kala owala ta heke uukadhona kutya ote wu yambidhidha paiyemo. Opolisi oye shi pondola okumu tula miipandeko molwaashoka aantu yoludhi ndoka oyiilongela okugeelwa,” Kapuka ta ti.
Kapuka okwa popi kutya sho ya yi mombashu yomulumentu ngoka oya a dhamo omizalo dhopolisi na otashi ulike kutya omulumentu ngoka okwa li nale omunambelewa gwOpolisi kOshikondo shEgameno lyAanenentu.
“Omulumentu ngoka okwa li omunambelelwa gwopolisi. Omupolisi ngoka e mu tula miipandeko oku mu shi na otwa mono kutya okwa kengelele uukadhona wa thika lyopo-50. Sho opolisi ya yi mongodhi ye otwa yi mekwatatthano nuukadhona wumwe mboka wa popi kutya omulumentu ngoka okwa yi nawo miihulo pamukalo ngoka,”Kapuka a tsikile ko.
Omunambelewa Omukuluntu gwOshikondo shOmauyelele gOshigwana mOpolisi yaNamibia, Edwin Kanguatjivi, okwa koleke oshiningwanima shoka na okwa popi kutya oshuundulilwa koshikondo shOmakoonakono gOmiyonena dhOpaukashike kOokantu opo okakadhona hoka ka ka pewe ehungomwenyo.
“Otandi koleke kutya okwa tulwa omuntu miipandeko nomakonaakono otaga tsikile. Shoka tandi vulu okupopya oshooka owala kutya ngele owa zimine okutsakaneka omuntu ngoka kuushi nale, owa tegelela shike? Otashi vulika a kale ongangala nenge omudhipagi. Otu na okukala twa kotoka. Ka tu shi kutya aantu ya ngapi mboka ya ningi iihakanwa yomulumentu ngoka. Eeno okwa li omunambelelwa gwopolisi ngoka a tidhwa miilonga ihe ina shunitha omuzalo gwe gwiilonga ngaashi tashi uthwa kompango. Ota tu mu tulilemo oshipotha shiikwatelela koshiningwanima shoka a ningi mOlyomakaya ihe kombinga yiipotha yilwe otaka pangulwa owala ngele yalwe mboka a ningile omuyonena yiiholola,” Kanguatjivi ta ti.
OVENDUKA KAKUNAWE SHINANA
Category: