Oongangala dhathika puhamano odhiiteyele mongeshefa yOmuleli wOngundu yoNamibian Economic Freedom Fighters (NEFF) Epafras Mukwiilongo molukanda lwEvululuko mOshakati ongula yEtitano.
Oombudhi dhoka okwa hololwa dhiiteye mongeshefa yaMukwiilongo sho dha teya ekende na odha tameke okupakela omakende giikolita muumbindja wawo. Oyali taya pangele okuya komashina ihe oompangela dhawo odha ponyo shoMukwiilongo e ya yi moshipala.
Mukwiilongo okwa adhikilile oongangala dhoka konima sho a yakelwa ko komuniilonga gwe Anna Mateus.Mateus okwa kala a taalela oombudhi dhoka mokambululu kekuma okuzilila mondunda ye yokulala.
"Osha li lyopotundi 01:00 ongula yEtitano sho nda dhengelwa ongodhi kuMateus ta lombwele ndje kutya ope na aantu taya teya ondunda yomanwino. Onda kutha meendelelo ondjembo yandje na onda yi kondunda. Onda thikama oshinano shoometa 20 okuza pondunda na onda mono aalumentu yaali ya thikama pondje konima yetungo taya talaomainyengo omanga yalwe yeli meni. Lwanima onda mono kutya aalumentu mboka ayehe kumwe oyeli yahamano," Mukwiilongo ta ti.
Pahapu dhaMukwiilongo aalumentu mboka yali pondje oya yi ontuku konima sho ya mono ohauto ya thikama. "Onda umbu mombanda iikando itatu naalumentu mboka oya fadhukaoo. Sho nda ende nduuka metungo Mateus okwiigidha kutya oongangala dhimwe natango omo dhili meni na gumwe gwaamboka yaali ya li meni okwa fadhuka po. Omutiyali okwa ningi omupya molwaashoka onde mu mono sho a kambadhala okupitila pekende onda umbu nda ukitha kombinga hoka a li ihe oholo inayi mu guma. Okwa shuna meni na onda kala tandi igidha kutya ngele okwa kambadhala okuya ontuku nena otashi vulika a yahwe nenge a dhipagwe," Mukwiilongo ta ti.
Mukwiilongo okwa hokolola ongangala ndjoka oya yi ontuku sho ya londo komashina na oya kala ya holama moombulu."Sho opolisi ya thiki otwa kongo miikololo ayihe ihe inatu mu mona. Konyala tu hulithepo olukongo sho omupolisi gumwe a mono omuntu e li konima yomalandithilo."
Pauyelele wopolisi omufekelwa ngoka okwa popi yakwawo na okwa holola kutya oMokasa Bar halyo owala ehala yali taya tala omeho esiku ndyoka molwaashoka oya li taya pangele okuya mostola tayi adhika puushinda nehala ndyoka ya teya. Omufekelwa gumwe ngoka a tulwa miipandeko okwa hololwa kutya okukeeleli gwomaliko pehala tali adhika popepi nobar ndjoka ya tewa."Otaku hokololwa kutya konima sho uulunga mboka wa ndopa omukeeleli gwomaliko ngoka okwa tondokele kehala lye lyiilonga. Okwa li a alandulwa na okwa tulwa miipandeko. Gumwe gwomaafekelwa okwa tulilwa miipandeko molukanda lwaNeshila sho opolisi ye mu dhimbulula molwaashoka okwa li e li kondje yodholongo sho a li a pewa omboloha oshiwike sha piti.
Aafekelwa yalwe natango oye shiwike kopolisi. Mukwiilongo okwa pandula opolisi sho ya li gandja ekwatho meendelelo ihe okwa nyenyeta woo kutya ompango otayi gandja unene emanguluko koongangala. Mukwiilongo okwa popi kutya oongangala dhoka odha tuku aanambelewa yopolisi nopolisi kayi na shoka tayi vulu okuninga. Okwa pula opo opolisi yi vule okupewa uuthemba wokulongitha oonkondo dhontumba.
OSHAKATI PLACIDO HILUKILWA
Category: