Elelo lyaNdonga olya popi kombinga aniwa yomatilitho gesso ngoka taga ningilwa yamwe yomaaleli melelo ndyoka, pethimbo lyomutumba gwiikundaneki ngoka gwa ningilwa mOmbala yaNdonga pOnamungundo mOshitopolwa shaShikoto oshiwike sha piti.
Amushanga gwElelo lyaNdonga Joseph Simaneka Asino, oye a lesha oshipopiwa shOmukwaniilwa Elifas moka mwa ningwa omalundilo ngoka.
“Omukwaniilwa pamwe nelelo lye otaya holola okuuva nayi kwawo omolwa omatilitho ngoka ga ningwa mOkongo kuyamwe po yomElelo lyUukwanyama kutya aaleli yamwe yomElelo lyaNdonga otaya ka dhipagwa,” omukanda gwa holola.
Omukanda ngoka ogwa tothamo elenga enene lyaNdonga mOshikandjo shaOnalusheshete, Shondili Amutenya, onga gumwe gwomwaamboka taya talika omeho noyeli momusholondondo gwaamboka taya dhipagwa kElelo lyuukwanyama aniwa.
Elifas pamwe nelelo lye otaya lundile woo Elelo lyUukwanyama kutya otali gandja uuyelele wa puka moshigwana kutya elelo lyaNdonga olya kanitha oshipotha mOmpangu yoPombanda mOvenduka omwedhi gwa piti.
Omalelo ngoka gaali ogena oontamanana dhoongamba momukunda Oshuudhiya mUuninginino wOshitopolwa shaHangwena naShikoto.
MuMaalitsa gwo-2004 Oontamanana dhoka pokati kElelo lyaNdonga nElelo lyUukwanyama odha etithwa ketsokumwe ndyoka lya shainwa kOmukwaniilwa gwAandonga, Immanuel Kauluma Elifas oshowo nOmukwaniilwa gUukwanyama nale, nakusa Mwetupunga Shelungu.
Etsokumwe lyopamushangwa ndyoka lya shainwa momasiku o- 14 gaMaalitsa, 2004 mOshakati, olyo lya etitha oontamanana dhoongamba pokati komalelo ngoka gaali molwaashoka oongamba dhelelo limwe odhili moshitopolwa shili kohi yelelo ekwawo.
Omukwaniilwa gUukwanyama monena, Kuku Martha Mwadinomho Kristian Nelumbu okwa pataneke etsokumwe ndyoka kutya kali na oonkondo molwaashoka naku li kalelapo okwa li ta ehama noonkondo na kali e na uuthemba okushaina omatsokumwe goludhi ndoka omolwa onkalo ndjoka a li muyo.
Pahapu dhOmukwaniilwa gUukwanyama monena, inaku ningwa oonkundathana naalelwa mElelo lyUukwanyama mboka oyo taya ka gumwa ketsokumwe ndyoka nomukwaniilwa nale ke na uuthemba okugandja po evi lyaakwashigwana.
Opwa gwedha kutya, oshitopolwa shoka kwa halika shi tulwe mElelo lyaNdonga oshi na aalelwa yElelo lyUukwanyama. Elelo lyUukwanyama olya tindi okuzimina etsokumwe ndyoka nokuli indika li tulwe miilonga. Shoka osho sha etitha Elelo lyaNdonga li ye kOmpangu tali pula opo ompangu yi tokole kutya etsokumwe ndyoka oli na oonkondo lyo li tulwe miilonga.
Oshipotha shoka osha pulakenwa lyotango mOmpangu yoPombanda mOvenduka momasiku 18 gaNovemba, 2013 oshoowo momasiku 27 gaJuli nuumvo sho ompangu ya ekelehi oshipotha shoka molwaashoka Elelo lyaNdonga olya ndopa okukwatelamo oombinga adhihe dhoka dha gumwa koshikumungu shoka pethimbo lya ningi eindilo lyopampangu.
Oombinga dhoka ongaashi epangelo; elelo lyevi lyaayehe mOhangwena, Oshikoto nOkavango; Elelo lyUukwangali mOkavango; Elelo lyAaleli yoPamuthigululwakalo; aakalimo naanafaalama moshitopolwa shevi shoka tashi mondjelwa.
Asino okwa lombwele iikundaneki miipathi yaElifas pamwe nomunyekadhi Seciali kutya elelo lyawo olyiipyakidhila nokukwatakanitha moshipotha shoka oombinga adhihe dhoka dha gumwa na otaya ka ninga natango eindilo kompangu.
Sho a ningilwa omapulaapulo, omunashipundi gwElelo lyUukwanyama George Nelulu okwa tindi omatilitho ngoka aniwa ga ningwa, ta popi kutya inaku ningwa omatilitho momutumba gwawo ngoka gwa ningwa mOkongo momasiku ga8 gaAguste.
Nelulu okwa popi kutya mbyoka iifundja tayi popiwa na okwa lombwele aakalimo yomoshitopolwa shoka tashi kondjelwa opo yangungumane palombwelo lya gandjwa aniwa kOmukwaniilwa gUukwanyama Kuku Martha Mwadinomho Kristian Nelumbu.
ONAMUNGUNDO NAMPA