Omakonaakono goDNA okwa hololwa kutya otaga yi moshipala omafumbiko gaakiintu yaali mboka ya hulithile moshiponga shohauto pOnankali momasiku 29 gaJuly. Aakwanezimo yaAnna Gustav, 19, na Christina Manya, 32, oya popi kutya oshiputudhilo shoNational Forensic Science Institute inashi mana okuninga omakonaakono goDNA.
Gustav naManya oyeli momusholondondo gwaantu yane mboka ya hulitha sho ololi yiidhenge mumwe omutse nomutse nohauto yotuukala nokonima oya hwama omulilo, noshiponga shoka osha ningilwa momukunda Onankali mondjila onene yaMuthiya naNdangwa. Omalutu gawo oga pi itaga vulu okudhimbululwa.
Sarra Iyambo, ngoka omukwanezimo gwaGustav naManya okwa popi kutya oogwantsezi mboka yaali oya monika taya londo mohauto ndjoka ya ningi oshiponga omanga oshiponga inashi holoka.
Oshiwike sha piti, ofamili oya ningile omapulaapulo Ombelewa yOmbudsman konima sho ya lombwelwa kOmupeha kOmufala J.J Mbandeka, gwOshikondo shoForensic Pathology Sub-Division kutya oye na okutegelela uule woomwedhi mbali dhili komeho opo ya kale ya mona iizemo.
Iyambo okwa popi kutya nonando ofamili oya pangele okufumbika oonakusa yawo momikunda dhawo oya tokola okufumbika pamwe aakiintu mboka.
Iyambo okwa li mondjila okuya kOnakale konima yoshiponga na okwa lombwelwa kutya omidhimba dhoogwantseyi otadhi tumwa kOvenduka momasiku ga3 gaAguste nomakonaakono otaga ningwa momasiku ga4 gaAguste.
Momasiku 11 gaAguste konima sho ya ningi omapulaapulo oombinga yomidhimba dhoonakusa yawo, oya lombwelwa kutya omakonaakono inaga pwa noonzapo dhomaso dhoka hadhi pumbiwa opo ku ningwe omafumbiko itadhi vulu okugandjwa.
Alpheus Haufiku, omukonaakoni mOmbelewa yOmbudsman shoka ombelewa yawo tayi vulu ninga okulombwela opolisi opo yi endeleleke omakonaakono.
“Kape na oshindji shoka ta tu vulu okuninga kakele kokupula opolisi opo yi endeleleke omakonaakono. Ota tu pula woo opo ya kwathele mokugandja omikanda dhuumbangi opo aakwanezimo ya faalele kiilonga molwaashoka oonzapo dhomaso otadhi gandjwa owala uuna omakonaakono goDNA ga manithwa.”
ONamibian Sun oya yi moonkundathana nOmukomeho gwoNational Forensic Science Institute, Dr Paul Ludik, okwa popi kutya omidhimba odha shunwa kOkatope sha landula oonkundathana dha ningwa nofamili.
Ludik, okwa popi kutya onkalo yokuninga omakonaakono ngoka onkalo yimwe ondhigu noonkondo na kape na mpoka muuyuni omakonaakono ngoka taga vulu okuningwa muule womasiku gaali.
“Iifundja yowala kutya ofamili oya lombwelwa ya tegelele uule womwedhi mbali molwaashoka aantu oyali mefudho.”
Ludik okwa popi kutya ofamili oya lombwelwa kutya oonzapo dhomaso otadhi gandjwa uuna omakonaakono ga gamanithwa.
OVENDUKA GORDON JOSEPH
Category: