Marina Kandumbu, ngoka a monika ondjo moshipotha shuulingilingi kOmpangu yaMangestrata gwaRundu, okwa tegelelwa a ka ganithilwe miilonga onga oshilyo shOmutumba gwoPaliamende momasiku 20 gaMaalista nuumvo.
Kandumbu okuli ponomola onti-77 momusholondondo gwiilyo yOngundu yoSwapo mbyoka tayi yi moPaliamende nuumvo.
Okwa monika ondjo miipotha yuulingilingi ya thika po-53 muNovemba gwomvula ya piti na okwa pewa egeelo a fute oshimaliwa sha thika poN$100 000 nenge uule woomvula ntano nondholongo.
Kandumbu okwa kala ta tamanekwa kwiikwatelelwa kOveta yOkulwitha uulingilingi, konima sho a hiilitha po egumbo lyepangelo komukwashigwana gwaAngola moRundu.
Okwa kala ta hiilitha egumbo ndyoka okutameka muMei gwo-2005 sigo omuApilili gwo-2010 kondando yooN$3 500 komwedhi.
Pauyelele mboka wu li momikanda dhompangu dhoka dha monika koshikundaneki shoNamibian Sun, Kandumbu ngoka a li omulukuntuskola poskola yedhina Dr Romanus Kampungu Secondary School, ethimbo ndyoka okwa longitha oonkondo dhombelewa ye pambambo mokuhiilitha po egumbo lye lyepangelo lyonomola 1452 moRundu, shoka tashi yi pondje omusindalandu gwomagumbo gepangelo.
Kandumbu okwa holoka komeho gOmupanguli Helen Olaiya, na okwa monika ondjo momasiku 11 gaNovemba omvula ya piti nokupewa egeelo esiku olyo tuu ndyoka.
Olaiya okwa gandja egeelo kuKandumbu opo a fute ooN$100 000 nenge a kale modholongo uule woomvula ntano moka ooN$90 000 dha kuthako nenge oomvula ne, ihe uuna owala a shunitha oshimaliwa sha thika pooN$87 557, okutameka momasiku 27 gaNovemba omvula ya piti.
Iifuta yahugunina oya pumbwa okukala ya futwa omanga omasiku ga7 ga June inaga pita.
Ekotampango olya indika oowala oonakupewa omageelo ge vulithe poomwedhi 12 ihe inaya pewa ompito ya fute , opo kaya ninge iilyo lyOmutumba gwoPaliamende.
Amushanga-Ndjai gwoSwapo, Nangolo Mbumba, okwa popi kutya okwa uvu owala omapopyo ngoka oshiwike sha piti na ina mona omikanda dhompangu.
“Uuna twa mono omikanda dhompangu ihe omapopyo ngoka ogoshili nena ota tu ka pula aanaveta yetu ya tale omikanda dhoka,” Mbumba ta ti.
Mbumba okwati, ina hala oku popya sha kombinga yoshikumungu shoka molwaashoka oshilongo oshowo ongundu yawo oyi na oompango dhoka dhi na oku landulwa.
Mo-2011 omanga a li omukuluntuskola poDr Romanus Kampungu Secondary School, okwa li a ningilwa omakonaakono omolwa uulingilingi wu na sha nomakonaakono. Okwa tamanekelwa woo elelo lyankundipala na okwali a kuthwa miilonga ye noku falwa a kalongele kombelelwa yelongo pakathimbo. Egeelo lye ndyoka olya li lya kuthwa po sha landula elombwelo lya pewa Omukomeho gwElongo mOshitopolwa shaKavango, kuAmushanga ta kalele Alfeld Ilukena.
OVENDUKA GORDON JOSEPH