Omupresidende Hage Geingob okwa holola kutya ota yambidhidha aaniilonga yomomeya mboka ye li mekanka.
Geingob okwa holola eyambidhidho lye pethimbo a tsakanene naaniilonga oshowo aakalelipo yaaniilonga mboka megumbo lyepangelo omutenya gwEtitatu, na okwa holola olukeno lwe naaniilonga mboka.
Okwa popi kutya Aanamibia naya pitike omahangano gopondje ga longele moshilongo ihe omahangano ngoka naga simaneke oompango dhomoshilongo.
"Itatu vulu okulongela kumwe ngele otamu tindile aantu yetu uuthemba wawo."
Geingob okwa pula Omupeha Minista mOshikondo shOohi nOonzo dhOmomeya, Chief Samuel Ankama, opo a kutheko omadhina gomahangano ngoka taga ihumbatele nayi aaniilonga.
"Eteni oomenindja mboka kungame," omuleli ta ti.
Geingob okwa nothelwako komukalelipo gwehangano lyoMetal, Mining, Maritime and Construction (MMMC) , Immanuel Petrus.
Petrus okwa yelitha kutya omolwashike ya tameke okuninga ekanka ndyoka. Okwa popi kutya ngele omuniilonga okweehamene momeya nena oha pewa owala uunamiti uuna ombautu ya galukile komutunda nenge uuna pe na ombautu yimwe ya pitipo yuuka komutunda molwaashoka moombautu dhoka haya longele kamu na aanembelewa yuunamiti.
Okwa lombwele omuleli kutya, aaniilonga mboka ohaya longo oowili oonde noonkondo na ohaya thiminika okulonga oowili o-24 dha landulathana.
Petrus okwa popi kutya Pampango yAaniilonga, omuniilonga okwa pitikwa owala okulonga oowili hetatu oshowo oowili ndatu dholutayima ihe omahangano gokukwata oohi itaga longo giikwatelela kOmpango ndjoka nUuministeli wAaniilonga kawu na shoka wa ningipo komahangano ngoka itaga iyutha koopango dhaaniilonga.
Okwa popi kutya aaniilonga yomomeya oya kala yiidhidhimika uule wethimbo ele okutameka mo-2008 na oya hala ngashiingeyi omuleli gwoshilongo iidhope moshikumungu shawo.
Petrus okwa popi kutya Uuministeli wIilonga owa ndopa okugandja komahangano gokukwata oohi omilandu dhokwiihumbata oshowo okuyapa omageelo uuna itaya ihumbata ngaashi ompango tayi utha.
Petrus okwa popi kutya okwa nyanyukwa sho omuleli gwoshilongo apula aakuthimbinga ayehe moshikumungu shoka ya kandulepo omukundu ngoka meendelelo.
Petrus okwa zimine nokukoleka kutya ekanka ndyoka kali li paveta ihe okwa popi kutya oya thiminikwa konkalo okuya mekanka lyaali paveta.
Aaniilonga mboka taya ningi ekanka oya holola kutya itaya ka shuna kiilonga sigo omanyenyeto gawo ga talikako kepangelo ndyoka lya pumbwa okukandulapo omaupyakadhi gawo.
Amushanga takalele mUuministeli wAaniilonga Bro-Matthew Shinguadja, okwa tseyithile Geingob kutya okuya kEtiyali lyoshiwike twataalela otaku kala kwaadhika etsokumwe mOshikondo shOohi.
Okwa koleke kutya omahangano gokukwata oohi otaga yi pondje Ompango yAaniilonga na otaku katukwa ookantu opo ku kale kwa kandulwa po uupyakadhi mboka okuya momasiku 10 gaNovemba.
KENYA MAMBOWE