Ominista yElongo, Katrina Hanse-Himarwa, okwa tseyitha kutya aavali itaya ka futa we iifuta yomakonaakono mondondo onnti-10 no-12.
Elongo lyoshali moondondo dhopombanda moshilongo oshi li oshiyetwapo shomuleli nale gwoshilongo, Hifikepunye Pohamba, ngoka a li a tseyitha kutya iifuta yooskola otayi ka hulithwapo naavali oshowo aatekuli yaanona itaya ka kala ye na omaipopilo gokwaahatuma aanona kooskola.
Sho a popi nOshifokundaneki shoNamibian Sun, mOsoondaha, Hanse-Hirmarwa okwa yelitha kutya sho taku kuthwa miilonga iifuta yooskola, mboka taya shanga omakonaakono ngaashi lyoNamibia Senior Secondary Certificate examination noJunior Secondary Certificate examination itaya ka futa we omakonaakono ngoka. Aanaskola otaya ka tegelelwa owala opo ya fute omihandjo. Okwa holoka omapopyo sha landula etulo miilonga lyelongo lyoshali moondondo dhopevi ndyoka lya tulwa miilonga mo-2013 kutya, iimaliwa mbyoka hayi gandjwa kepangelo oyili pevi noonkondo na inayi gwana okukandulapo oompumbwe adhihe mooskola. Mo-2013 okwa lopotwa kutya omuyalu gwaanona ngoka gwashangithwa mooskola dhopevi ogwa londo sigo okukoyelela aanona oma-15 000 sha landula etulo miilonga lyElongo lyOshali mOondondo dhoPevi moshilongo.
Sho a pulwa ngele otashi vulika ooskola dhimwe dhika kale inadhi hala okutula miilonga omulandu ngoka, minista okwa popi kutya ooskola adhihe dhepangelo okwa tegelelwa dhika tule miilonga omulandu ngoka na itapu ka kala oonkundathana dha sha.
Hanse-Hirmarwa okwa pandula woo Omupresidende Hage Geingob, sho a pula opo omikuli dhokwiilonga dhoka hadhi pewa aailongi dhi lundululilwe momakwatho gokwiilonga.
"Epangelo otali katuka oonkatu noonkatu mokuyambulapo nokulundulula oonkalamwenyo dhAanamibia. Tango osha li elongo lyoshali moondondo dhopevi , mongashiingeyi elongo lyoshali moondondo dhopombanda. Omasiku ga piti omupresidende okwa pula ehulithepo lyomikuli dhomailongo nokulundulula omikuli dhoka momakwatho. Otatu pula komeho," minista ta ti.
GORDON JOSEPH