Aalongekidhi yomauliko ngoka giipindi mondoolopa tayi adhika kOnooli yoshilongo oya tumbalekwa kutya oya longa oshilonga sha simana.
"Sho twa thiki mpaka esiku lyotango otwa li twa kumwa omolwa ehala ndyoka lya longululwa. Shoka osho twa kala twa tegelela," Victoria Davod gwoLaweda Trading ngoka a kala nokukutha ombinga momauliko ngaka uule woomvula dha piti ta ti.
Omapopyo gaDavid oga kolekwa kaalandithi yamwe ngaashi Nanguloshi Nghilengwa.
"Omalunduluklo ngoka ga ningwa otaga monika kukehe gumwe. Aalongekidhi oya pumbwa okupandulwa molwaashoka oya longa oshilonga sha simana," Ngilengwa ta ti.
Gumwe gwomwaamboka ya talele po omauluko ngoka, Martha Johannes okwa pandula omatungo omape gokuningila omauliko ngoka na okwa popi kutya monena ondoolopa ndjoka oyili methigathano noondoolopa ookwawo pankatu woo yokuninga iipindi.
Sammy Mushelenga okwa popi kutya omalunduluko ngoka otaga tsu omukumo kwaamboka ya kala nokugandja omakwatho gopashimaliwa komauliko ngoka uule woomvula omulongo monena.
okwa popi kutya monena shoka sha pumbwa okuningwa kaaunganeki yomauliko ngoka okukwashilipaleka owala ekwateko lyoongeshefa oonene nenge omahangano gepangelo opo ga tameke okukutha ombinga momauliko ngoka.
Mayola gwaHelao Nafidi, Paulus Haikali okwa popi kutya oya longitha iimaliwa ya thika poomiliyona 4.2 mokulonga ehala ndyoka epe.
"Iilonga inayi pwa natango , otatu tsikile nokulonga iitopola yimwe mbyoka inayi manithwa," Mayola ta ti.
Omauliko ngoka oga patululwa pambelewa kOmupilima Minista gwOshilongo, Saara Kuugongelwa-Amadhila mEtine lya piti.
Kuugongelwa-Amadhila okwa popi miikundnaeki omathimbo ga piti kutya oolopota kutya iiketha yiimaliwa yopondje moNamibia otayi pu masiku konima owala yiiwike ihetatu, kage na uukwashili. Okwa ti oolopota dhoka odha ningwa sha landula olopota yoBank of Namibia yetatamvula, ndjoka ya pitithwa muSepetemba.
Olopota ndjoka oya popi kutya iimaliwa yopondje yoshilongo mbyoka yili moshilongo okuya momwedhi Juni, otayi vulu owala okufutila iiyetwamo moshilongo uule woomwedhi dha thika pumbali.
Minista okwa popi kutya endjandjukununo lyonkundana ndjoka oya puka, sho kwa popiwa kutya iiyemo mbyoka otayi ka pwapo muule wiiwike ihetatu.
Nonando ongaaka, okwa popi kutya, elando lyiinima pondje yoshilongo muule wiiwike 7.7 olili pevi noonkondo na kashi li mondjila na ope na ompumbwe onene yokutungapo ondjele yili pombanda yiimaliwa yopondje opo ku vule okugamenenwapo eliko lyoshilongo.
Minista okwa popi kutya eyo pevi lyondjele yiimaliwa yiilongo yilwe moNamibia osha etithwa kefalo li li pombanda pondje yoshilongo iimaliwa mbyoka.
Okwa popi natango kutya aapunguli oyendji ya za pondje yoshilongo otaya pungula iimaliwa yawo moshilongo, omanga Aanamibia itaya longitha ompito yokupungula iimaliwa yawo pondje yoshilongo.
Minista okwa popi kutya monena elando lyiinima pondje yoshilongo olyo tali etitha omwaka gwompumbwe yiimaliwa yiilongo yopondje.
Omalanditho pokati koshilongo niilongo yopondje oga kala nokumona iiyemo yopombanda muule woomvula dha piti, ihe monena ondjele yiiyemo mbyoka oya kala tayi gu pevi. Momvula yoma-2012 oshilongo osha mono iiyemo ya hupako yoobiliyona 2.9 ihe mo-2014 oshilongo osha kanitha molwaashoka Namibia okwiikolelela unene kiilongo yopondje moshikondo shomayakulo gomalweendo. Mo-2014 oshilongo osha kanitha iiyemo ya thika poobiliyona 3.5.
Omuliko gaHelao Nafidi gwomomvula yo-2015, oga tameke momasiku 26 sigo Osoondaha, na oga kala aalandithi ya thika pe-170.
PLACIDO HILUKILWA