Oongundu owala ne dhopolotika tadhi ka kutha ombinga momahogololo gAaleli yIitopolwa nOondoolopa mIikandjo owala ine yomiikandjo 12 mbyoka tayi adhika mOshitopolwa shaMusati. Mboka otaya kutha woo owala ombinga moondoolopa 2 dhomoondoolopa ntano moshitopolwa.
Uuyelele mbuka owa hololwa pethimbo aanambelewa yOkakomisi kOmahogololo mOshilongo ano oElectoral Commission of Namibia (ECN) ya popitha omutumba ngoka gwa ningilwa mOutapi oshiwike sha piti.
Konima yomutumba ngoka gwa patululwa kuNgoloneya gwaMusati, Erginus Endjala, aanambelewa yoECN oya tseyithile aakuthimbinga kutya ongundu owala yoDTA, NUDO, RDP noSwapo odho dha holola ohokwe okukakutha ombinga medhigathano lyomahogololo mondoolopa yaRuacana
ODTA noSwapo oya holola kutya otaya ka kutha ombinga momahogololo mOndoolopa yaShikuku, ihe mOndoolopa yaKahao, Outapi oshowo oTsandi, aaulikwa yoSwapo itaya ka kondjithwa.
OSwapo noRDP oya ulike aahogololwa yawo mIikandjohogololo shaGongo naEtayi, omanga DTA noSwapo natango taya ka thigathanapo mOshikandjo shaKalongo.
Swapo itayi ka kondjithwa mIikandjo ngaashi Anamulenge, Outapi, Onesi, Tsandi, Okahao, Otamanzi, Elim, Oshikuku nOgongo.
Aanambelewa mboka oya tseyithile aakuthimbinga momutumba onkalo yomalongekidho, egameno noompangela dhomalweendo pethimbo lyomahogololo ngoka twa taalela okuya pehulilo lyomweedhi nguka tuli.
Aanambelewa oya popi kutya oya tegelela iikwaniipangitho yokuhogolola yikale ya thika mOutapi okuya momasiku 16 gaNovemba. Iilongithomwa mbyoka otaya ka kala ya egulukila oongundu dhoka tadhi kutha ombinga opo dhi yi ningile omakonaakono.
Kakele kaaleli yoshitopolwa nookansela, aakalelipo yomalelo gopamuthigululwakalo, aaleli yoongeleka, aakalelipo yoongundu dhopolotika nopolisi nayo oya hiwa komutumba ngoka, ihe aakalelipo owala yOngundu yoSwapo ya kala momutumba ngoka. Aakuthimbinga momutumba oya pula opo oongundu dhopolotika dhi ninge omahwahwameko gadho gomahogololo pambili.
PLACIDO HILUKILWA