Aaniilonga mboka oyeli iilyo yoMining, Metal, Maritime and Construction (MMMC)ndyoka tali kwatakanithwa nehangano lyoNamibian Nationak Labour Organisation (NANLO.
Onzo yomeni oya lombwele oshifokundaneki shika kutya ekanka ndyoka otali ka guma noonkondo Oshikondo shOohi.”Oshikako shokukwata oohi dhoka hadhi ithanwa kutya ooHake shoka sha patele muKotomba otashi patuluka ishewe muNovemba nomahangano otaga ka kanitha oshindji ngele uupyakadhi mboka inawu kandalulwapo. Ekanka ndika otali ka guma woo oshikondo sheliko lyoshilongo,” omuniilonga gumwe ta popi.
Aaniilonga mboka oya ningi omunyanyo okuya poombelewa dhUuministeli wOkutotapo Oompito dhIilonga oshowo Iikwafambulika mOndoolopa yaMbaye, taya pula opo ya yamukulwe.
Gertude Usiku, omukomeho gwoshikondo shIilonga muuministeli mboka okwa tsakanene naakalelipo yaaniilonga ya thika puyane na okwe ya tseyitjile kutya omanyenyeto gaaniilonga okwe ga ukitha kuAmushanga takalele mOvenduka. Nonando ongaaka Usiku okwa popi kutya ombapila yomanyenyeto gaaniilonga inayi mona eyamukulo molwaashoka omukanda ngoka inagu shayinwa nakaguna omadhina.Usiku okwa popi kutya amushanga okwa holola kutya aaniilonga naya ye mekwatathano naye opo ya vule okumona eyamukulo lyawo.
Thereza Hetwali ngoka e li omuunganeki gwoMMMC, okwa ekelehi omapopyo ngoka na okwa popi kutya Amushanga Bra-Mathew Shinguadja okwa holola kutya okwa yakula omukanda gomanyenyeto ganiilonga mboka na ote ke ya yamukula, okupitika momunashipundi gwoMMMC, Immanuel Petrus.
Usiku okwa kunkilile aakwateli komeho yehangano ndyoka ekellipo lyaaniilonga opo ya kumagidhe aniilonga ya shune kiilonga molwashoka otashi vulika ya kanithe iilonga yawo. “Omanyenyeto geni oge li mondjila ihe omuli moshiponga shokukala mwa kanitha iilonga yeni ngele inamu ya kiionga na otamu kutha ombinga mekanka lyaali paveta.
Usiku okwa pula omahangano gaaniilonga kaga longithe aaniilonga mekondjelo lyago lyuuleli.
“Eteni omaupyakadhi geni kuuministeli. Eteni omaupyakadhi geni mofoloma yo LC10. Omukalo ngoka ohagu kutha owala omasiku 30, nomuule wiiwike iyali otaya ka kala ya mona eyamukulo.”
Pahapu dhaHetwali omukalo ngoka tagu popiwa kuUsiku ihagu longo molwashoka omahangano gawo oge na iipotha oyindji nuuminiseli mbyoka ya pumbwa okumanithwa natango. Usiku okwa popi kutya oya tokola okuya moonkundathana nomahangano gatatu oNamibian Seamen and Allied Workers Union NASAWU, Namibian fuel and Allied Workers Union NAFAWU, oshowo Namibian Fisheries Institute NFI momvula yo-2004. Pethimbo ndyoka omahangano ganiilonga oga tsu kumwe na oga hogolola aaniilonga ya kale taya futwa kokomisi pehala lyokufutwa olutayima.
Ehangano lyoMMMC ndyoka tali popi kutya olya kalelapo oopresenda dhaaniilonga yoomeya dha thika po-95 kalya limo momutumba ngoka molwaashoka inali tambiwako onga ehangano ekalelipo lyaaniilonga.
Kwiikwatelelwa kOmpango yAaniilonga, omahangano oha pewa oomwedhi ndatu opo ga tseyithile omahangano omakalelipo gaaniilonga ga tule miilonga uukwashilyo awuhe mboka wa kanithwa, omanga oonkundathana inadhi tameka.
Omunashipundi gwoConfederation of Namibian Fishing, Matti Amukwa okwa lundile omahangano ngoka inaga taambiwako kutya otaga unganeke omakanka gaali paveta onga omukalo gwokwiimonena iilyo.
Amukwa okwa pula opo omakanka agehe ngoka taga ningwa ga ningwe monkalo yomondjila taku landula ooveta.
Aaniilonga mboka oya ekelehi omapopyo ngoka ga ningwa kOmupresidende gwoNASAWU kutya ohaya mono iiyemo yili pokati kooN$11 000 nooN$18 000. Aaniilonga oya ulike uumbapila wawo woondjambi dhawo, mboka wa holola kutya ohaya futwa oondjambi dhili pokati kooN$2 500 nooN$5 000.
OTIS FINCK