Omupresidende Hage Geingob okwa pulwa opo a talulule euliko lyOminista yUyuuki Albert Kawana ngoka oshiwike sha piti uula oongundu dhompilameno kutya “oomwe nomafuma”
Eindilo ndyoka olya ningwa komupopiliko gwOngundu yoRally for Democracy and Progress (RDP) Nghiningiluandubo Kashume, ngoka a popi kutya Kawana ota longitha pambambo oonkondo dhe dhombelewa. Kawana okwa lopotwa a popi oshiwike sha piti kutya oongundu dhompilameno odha fa
oomwe nomafuma ngoka haga holoka owala uuna taku lokwa na ohaga shuna ngele omvula ya shuna
“Kawana okwa pumbwa okudhimbulukithwa kutya oongundu dhompilameno odhina owala aantu ya shitwa moshifeka shaKalunga ngaashi aantu ayehe”.
Kashume okwa popi kutya omapopyo ngoka ga ningwa kuKawana pethimbo lyomahwahwameko gOngundu yoSwapo gomahogololo gAaleli yIikandjohogololo nOmalelo gOondoolopa ngoka ga ningilwa mOshitopolwa shaMusati oga faathana naangoka ga ningwa moRwanda na oga etitha iikolokosha mbyoka ya faalela oomwenyo dhaantu oyendji mo-2004.
Okwa popi kutya Aanamibia unene Ongundu yoRDP oya tegelela Kawana a kale ta longo iitulamo mokuyambulapo oshikondo shUuyuki.
“Onga Ominista yUuyuku okwa pumbwa okumona kutya okwa puka momukalo ngoka otayi pondje Ekotampango lyaNamibia ndyoka ye a li e na okukala ta gamene,” Kashume ta ti.
Kashume okwa popi kutya omaihumbato ngoka ogo ga ningitha ongundu yawo yi pule omuleli gwoshilongo a talulule euliko lyaKawana onga ominista yoshikondo shoka molwaashoka ita longo uuyuki ponkatu ndjoka ye li.
Omupopiliko gwoRDP okwa popi kutya oongundu dhompilameno odha totwapo tadhi wilikwa kEkotampango lyoshilongo, ndyoka tali utha aakwashigwana ya kale koongundu dhopolotika kehe dhehogololo lyawo.
KENYA KAMBOWE