Junias Hafeni Nangolo okwa tulwa miipandeko mEtine lya piti na ota tamanekelwa oshipotha shedhipago yomumwayinagona omunamimvo 36 , Martin Nambala Namwandi, ngoka a dhipaga sho a tsuwa mombunda nomothingo.
Nangolo okwa holoka komeho yOmpangu yaMangestrata mOshakati mEtitano lya piti noshipotha she osha undulilwa komeho opo ku gandjwe ompito komakonaakono ga tsikile.
Omolwa oshipotha shoka, Attorney-General Sacky Shanghala okwa holola kutya otaka pula Okabinete koshilongo opo ka gandje eziminino kOkakomisi koReform and Development Commission (LRDC) of Namibia ka longekidhe omikanda dhoonkundathana nomashangitho kombinga yiinima mbyoka ya guma oongundu dhopaitaalo, oongeleka oshowo omahangano galwe gopaitaalo.
Komanda gwOpolisi yaShana, kOmufala Rauha Amwele, okwa lombwele oshifokundaneki shoNamibian Sun kutya omudhimba gwaNamwandi ogwa monika mEtine ongula momukunda tagu ithanwa Omakango mOshikandjohogololo shaNdangwa nopolisi otayi fekele kutya oshimbuluma shoka osha longwa pwa piti esiku limwe omanga omudhimba inagu monika.
“Aamwayinagona mboka oya monika lwahugunina ye li pamwe puundingoshowomomudhingoloko ngoka mEtitatu naashoka osho tatu fekelele kutya kutya okwa dhipagwa momasiku 14,”Amwele ta ti.
Pahapu dhaAmwele, omufekelwa sho a tulwa miipandeko okwa popi kutya okwa pewa omayele komusita gwumwe gwongeleka yoshiveva opo aniwa a ye a kamone onganga a vule okuyambulapo eliko lye.
Onganga ndjoka kayi shiwike natango aniwa oya lombwele Nangolo kutya ngele okwa hala ongeshefa ye yi koke , nena okwa pumbwa okudhipaga omukwanezimo gwe.
Konima aniwa sho Nangolo a dhipaga mumwayinagona okwa shuna natango konganga ndjoka na okwa tetwa nokambi kompanda dhe opo aniwa a gamenwe ye kaavule okutulwa miipandeko kopolisi omolwa edhipago ndyoka.
Pethimbo onkundana ndjika ya nyanyangidhwa inashi yelamo ngele onganga ndjoka nayo oya tulwa miipndeko
“Shoka sha ningwa otashi piyaganeke nayi omadhilaadhila gaantu na otatu kwashilipaleke kutya aantu ayehe mboka ya dhana onkandangala medhipago ndika oya tulwa miipandeko,”Amwele ta ti.
Ekuthombinga lyongeleka
Sho a ningwa naye oonkundathana koNamibian Sun sho onkundana ndjika yiihanene komapandja gomakwatathano gopainternet, Shanghala okwa popi kutya ombelewa ye melongelo kumwe nUuministeli wUuyuuki otaya yi moonkundathana nElelo lyOongeleka moNamibia ano oCouncil of Churches in Namibia.
“Onda gandja nale omayele kOkabinete opo oongeleka noongundu dhopaitaalo adhihe dhi pangelwe kompango. Pethimbo ndali koLRDC otwa dhidhilike kutya ope na aasita yoongeleka dhoka mboka ya kala okuhokanitha aantu nonando kape na aanambelewa ngaashi tashi uthwa kOmpango yOmavalo, Oondjokana nOmaso. Shoka ohashi ka kala oshidhigu uune gumwe gwomaahokanathani a hulitha, oshidhigu okugandja omauthiga kunakudhigwa po molwaashoka ka pe na uumbangi mboka tawu holola kutya aantu mboka oya li ya hokana shili gwo omathano goondjokana dhawo ihaga holola ngele aantu oya hokana shili paveta,”Shanghala ta ti.
Shanghala okwa popi kutya oolopota dhimwe otadhi holola kutya aantu otaya kengelelwa kaasita yoongeleka dhoka.
“Nonando Ekotampango yOshilongo otali gamene uuthemba nemanguluko, natango Ekotampango olyo tuu ndyoka olya tulapo omangambeko kemanguluko ndyoka nuuthemba. Pamaiyuvo gandje ondi wete kutya okwa pumbiwa oonkundathana opo mbyoka ya nyanyukilwa oongeleka dhawo ya vule okulonga taya iyutha kEkotampango.”