Omuleli gwaNamibia okwa tseyitha kutya otaka gandja oopresenda 20 dhondjambi ye mokutota po oshiketha shomayambidhidho gaanona mboka taya lumbu moluhepo.
Hage Geingob okwa ningi etseyitho ndyoka mehuliloshiwike mOvenduka pethimbo kwa tamekithwa omahwahwameko gwOngundu yoSwapo omolwa Omahogololo gomalelo gIitopolwa nOondoolopa.
Geingob okwa lombwele aayambidhidhi yoSwapo kutya etseyitho lye otali ka kundathanwa nale.
“Molwaashoka otatu kondjitha oluhepo oshindji noonkondo okukala tatu pula oshindji okuza kepangelo omanga tu nale oompito dhiilonga omanga pe nayakwetu kaye na iilonga. Atuheni mboka tu na iilonga natu shunitheni pevi omuyalu gwiimaliwa mbyoka hatu longitheni opo tukwatelenipo iiyemo mbyoka hatu mono”
Omutseyinawa gwopolotika, Nico Horn, okwa pandula Geingob omolwa etseyitho lye ndyoka a ningi.
“Okwa gandja oshiholelwa oshiwanawa ka kushi owala kaaniilonga yepangelo ihe okAanamibia ayehe.”
Amushanga-Ndjai gwoRally for Democracy and Progress (RDP) Mike Kavekotora naye okwa pandula Geingob ihe okwa popi kutya nonando ongaaka omakwatho goludhi ndoka inaga pumbwa okuza kaaleli yopashigwana mboka ye na oshinakugwanithwa shokuwapaleka omapuko ngoka ge li po. Okwa popi kutya etseyitho lyekwatho ndyoka otali hwahwamekwa kopolotika naathigona inaya pumbwa ohenda yomupresidende ihe oya pumbwa omilandu dhili miilonga dhoka tadhi kandula po omauthigona gawo.
Omupresidende nale gwoCoD Ben Ulenga naye okwa pandula Geingob ihe okwa popi kutya otashi ka kala oshiwanawa ngele epangelo tali gandja iimaliwa yi vule okulongithwa melongo lyAanamibia ayehe.
ELVIS MURARARANGANDA