Omadhipago giipundjamenye taga ningilwa aakiintu moshilongo onkene taga pula komeho noshigwana otashi dhigwa momalimbililo komadhipago ngoka nokweetitha omaipulo ogendji kutya oshike sha pumbwa okuningwa opo ku hulithwepo omadhipago ngoka taga ningwa.
Pethimbo mpoka oshigwana natango shi li momalimbililo omolwa edhipago li nyanyaleka ndyoka lya ningilwa aamwayinakadhona yaali mOvenduka oshiwike sha piti kugumwe gwomaalongiskola ngoka taku hokololwa kutya okwa li e li mekwatathano lyopahole nomunaskola ngoka a dhipagwa pamwe namumwayinakadhona omukuluntu, natango olutu lwokanona kokakadhona olwiitsuwa mOshitopolwa shaShikoto.
Omudhimba gwomunamimvo 14, Menette Tulela, ogwiitsuwa miihwa momukunda Oshiyashemanya mOshikandjohogololo shaMuthiya.
Omupopiliko gwOpolisi, Omupeha kOmufala Edwin Kanguatjivi okwa koleke kutya omudhimba gwokakadhona hoka ogwiitsuwa lyopotundi 07:30 mOmaandaha.
Okwa hokololwa kutya nakusa oka kana mOsoondaha lyopotundi 10:25 sho a li e na okuya kongeleka ya Onuungonya.
Kanguatjivi, okwa popi kutya aavali ye oya yi tango kongeleka na oye mu thigi megumbo nomuniilonga gwomegumbo.
Sho ya galukile kegumbo inaye mu adha mo sigo osho omudhimba gwe gwiitsuwa ongula ya landula.
Nakusa okwa adhika nongodhi mothingo na otaku fekelwa kutya okwa dhipagwa nongodhi ndjoka.
Omunamimvo 31 omuniilonga gwomegumbo okwa tulwa miipandeko shi na ekwatathano nedhipago ndyoka.
ELLANIE SMIT