Epangelo otali ka tala kompito yokutunga omagumbo gaakokele. Ndhika odha popiwa kOmupresidende Hage Geingob pethimbo a popitha aakalimo yomOshitopolwa sha//Kara oshiwike sha piti.
Okwati ohoni onene mokumona kutya aakokele itaya silwa oshipwiyu komaluvalo gawo momagumbo gayo yene yo ishewe oye li moluhepo olunene.
"Aantu oya sondjala; kashishi owala miitopolwa yokuushai. Paushili, aantu mboka ye li miitopolwa yokuushai aahwepo ye vulithe mboka ye li moondoolopa. Aanona oya sa ondjala pethimbo lyootundi," Geingob ta ti.
Omapopyo ga Geingob oga landula omanyenyeto ga ningwa kaakulupe mboka ya popi kutya oyatila okusa onga oshizemo shomikalo nomaihumbato omawinai taya ningilwa kaanona yayo yene.
Pahapu dhaakokele, uunona wuulumentu uunyanyamagulu owu ya li mokashoko ethimbo nethimbo ngele taya yi ya ka taambe oopenzela dhayo.
"Yamwe yomaanona yetu ohaye ya komagumbo ya kolwa opo ya konge iikulya noha ye tu ningile omatilitho ngele kape na sha shokulya. Natuse tango opo pa ningwe sha?"
Okwati manga ina gwedha ko sha, shotango, aapolishi moshitopolwa shawo ohaya nyenyeta ompumbwe yiiyenditho.
"Ohaya popi owala nokutya kapena ohauto e taya kala inaa ye ya. Nenge ya pule ngele opena etikolyombizi, na ngele oshimpwiyu shoka shi li po oshofamili, opo shi kandulwe po meni lyegumbo," omukalimo ta ti.
Aakokele oya pula wo epangelo lyi opaleke omagumbo gawo opo aakwanezimo yawo ya vule oku ya sila oshimpwiyu pehala lyokutaambelwa miipangelo yEpangelo.
Osheetwa po oshikwawo ye eta po osho shoka kutya, kaye na uundjugo nomahala gomafutilo mpoka haya monene oopeenzela dhawo, kwaashika omupresidende Geingo okwa yamukula ta ti: "Aanamibia oyehole okunyeyeta."
Okwa pula aakokele opo ya konge omukalo ngoka tagu ya pitike opo ya kale haya mono oopeenzela dhawo okupitila koombanga nomikalo dhilwe dhi ili.
"Aanona mboka haye mu nyeke oolye, kaye shi aanona yeni? Aavali noongeleka wo oya ndopa aanona mbaka," Geingob ta ti.
Geingob okwa umanene aavali sho taya pitike aanona, yamwepo oye na oomvula dhi li omulungo nenge ooshona, opo ya kale moondingosho.
Nande ongaaka, aakalimo otaya popi kutya uuthemba wuunona owo ita wu pitike aakuluntu ya ninge sha aanona mboka itaye iyutha komalandulathano.
"Nandi ku pe oshiholelwa: Ngele onda dhenge enkawa okanona koomvula 12 sho keya kegumbo uusiku, opolisi otayi ya noohauto dhili ne opo yi ye yi kwatendje po esiku lya landula," gumwe gwomaakalimo ta ti.
Aakalimo oya nyenyeta wo shi nasha nuundingosho wontumba moshitopolwa shawo, mboka ya popi kutya ohawu nana omangungo omanene gomauvitho kuzilila koongeleka.
"Iikolitha niingangamithi oyo iimpwiyu iinene nolundji aanona ohaya kanithile oomwenyo dhowo miinima mbyoka," ta ti.
JEMIMA BEUKES