Omukiintu omuniilonga gwehangano ekeeleli lyomaliko lyo-901 Security Company mOshakati okwa kanitha omulungu gwe gwopevi sho a lumatwa omulungu kookastoma dhopondunda yomanwino mpoka a li ta ongele ongulohi yEtine lya piti.
Sho a agandja ehokololo lye, omunamimvo 39 Victoria Hipyawa Shatiwa okwa popi kutya uupyakadhi owa tameke sho omuniilonga pamwe naye nale Altmann Matias, ngoka a li a tidhwa miilonga omolwa oshipotha shulunga e ya pondunda ndjoka yomanwino yedhina Stop Bar mOneshila e li pamwe nomulumentu gumwe ngoka e mu shi owala nedhina Kalola.
“Altmann okwa li hatu longo pamwe naye nale na okwa tidhwa miilonga omolwa oshipotha suulunga pobar ndjoka nda li tandi longele ongulohi ndjka,”Shatiwa ta ti
Okwa popi kutya aalumentu mboka oya kala taya dhana eshina ihe sho inaya vula okusindana sha, Altmann okwa tameke ta dhenge eshina noongonyo.
“Onde mu lombwele opo ka dhenge we eshina ihe okwa geye na okwa ningile ndje omatilitho kutya ota tsu ndje nombele na okwa tilendje omeya moshipala omanga ina onokelandje noongonyo.
“Shatiwa okwa popi kutya okwa kambadhala okuya ontuku okuza komuponokeli gwe ihe Kalola okwe mu kwata komaako gokonina na osha gandja ompito kuAltmann opo a kokoteko omulungu gwe.
“Shoka sha uvitha ndje oshoka kutya mondunda moka omwa li aantu yendji ihe kape na ngoka a kambadhala okwiidhopamo sho nda ponokela kalumentu mboka yaali,”Shatiwa ta ti.
Konima sho aalumentu mboka ya yi opo gumwe gwomwaamboka ya li mondunda ndjoka a pula okugandja ekwato kuShatiwa opo e mu fale kopolisi a ka patulule oshipotha.
Kalola okwa tulwa miipandeko ihe Altmann natango ota kongwa pethimbo onkundana ndjika ya nyanyangidhwa.
Shatiwa okwa popi kutya okwa kala ta longo onga omukeeleli gwomaliko okutameka omvula 2002 naashoka oshikando shotango ta kutha ombinga molugodhi.
Altmann otaku popiwa kutya okuli oshilyo shOngundu yoPamuthigululwakalo yedhina Ondjondjo Cultural Group. Shatiwa ota pangele okulopota oshiningwanima kompangu yopamuthigululwakalo opo a vule okufutwa.
PLACIDO HILUKILWA
Category: