Omufekelwa medhipago lyaamwayinathana mboka okwa tulwa miipandeko, konima sho omalutu gaana omwenyo gaakiintu mboka ga monika komweendi gwokolupadhi omutenya gwEtita momulamba tagu adhika popepi noskola yopevi yaElim moKhomasdaal mOvenduka.
Omufekelwa ota mono epango moshipangelo konima sho a kambadhala okwiidhipaga konima sho a longo oshimbuluma shoka.
Omufekelwa okwiinekeliwa kutya omulongiskola poskola yaAugustineum Secondary School, na okwa tulwa miipandeko ongulohi yOlyomakaya sho a kambadhala okwiidhipaga pa ku nwa omeya gopatilii.
Okwa monika okambapila hoka a shanga, hoka monena ke li momake gopolisi na inaku hololwa natango uuyelele mboka wuli mombapila ndjoka.
Onakukanithila oomwenyo dhawo momukalo ngoka gu nyanyaleka okwa hololwa kutya omunamimvo 30, Cecilia Kambuu Kuaseua oshowo omunamimvo 18,Jacqueline, naamboka oya dhipagwa lwopotundi- 14:00 mEtitano. Edhipago ndyoka olya geyitha aakalimo yomoKhomasdaal mboka ya nyenyetele opolisi kutya ihayi patolola omudhingoloko gwawo.
Aanamibia oya longitha omapandja gomakwatathano gointernet mokuulika okuuva nayi kwawo omolwa edhipago ndyoka.
Yamwe po oya pula woo opo ohate yi galuke.
Omapopyo inaga kolekwa oga holola kutya gumwe gwomaakiintu mboka okwa li mekwatathano lyopahole nomufekelwa ihe shoka sha thiminike omufekelwa a longe oshimbuluma shoka kasha shiwike.
Pauyelele wopolisi, omidhimba dhoonakusa odhili kokila yopolisi nomakonaakono otaga ningwa okumona oshiyetithi shomaso, nokuyeleka omapopyo ngele oonakusa oya dhipagwa nomamanya shili .
Oolopota dhimwe odha holola kutya gumwe okwa dhipagwa nomamanya omanga mukwawo a tsuwa nombele. Aanambelewa yopolisi aakuluntu oya lombwele iikundaneki kutya ookondoma mbali inadhi longithwa odha a dhika pehala lyoshiningwanima naashoka osha e ta omakoneneno kutya omufekelwa okwa kambadhala okukwata onkonga.
A kondema omadhipago
Kansela gwOshikandjohogololo shaKhomasdaal, Magaret Mensah-Williams,ngoka a li pehala lyoshimbuluma ongulohi yEitano okwa pula aavali, oongeleka nopolisi yi longele kumwe moonkambadhala dhokushunitha pevi iimbuluma.
Okwa popi kutya aavali oya pumbwa okulonga oyana unene opo kaya ende we omausiku nenge ya longithe oondjila oofupi dhoka dha pita momilamba.
“Omadhipago ngaka otaga uvitha nayi noonkondo. Oshilongo osha pumbwa ehupitho nethimbo olya thikana oongeleka dhi thikame nokuyambidhidha epangelo.”
Omupresidende Hage Geingob naye okwa talelepo ehala ndyoka mOlyomakaya na okwa holola okuuva nayi kwe omolwa ondjele yiimbuluma ndjoka tayi londo pombanda noonkondo moshilongo.
Geingob ngoka a li pamwe nomunyekadhi gwoshilongo Monica Geingos, okwa gandja woo omahekeleko kofamili yoonakusa.
Omutse gwoshilongo ogwa gandja elombwelo kOpolisi yaNamibia oshowo Opolisi yOshilando ya wapaleke omilamba nokukwashilipaleka kutya oya patolola omahala ga yooloka opo ku yandwe iimbuluma yoludhi ndoka.
Omapopyo gomufekelwa koFacebook
Omapopyo ga ningwa komulumentu ngoka a tulwa miipandeko kepandja lye lyoFacebook oga ulike kutya mEtiyali okwa li ta kongo ekwatho lyopambepo sho a popi kutya okwa hala okuhupithwa okuza koshiluli shoka tashimu monitha iihuna, na okwa ningi omapopyo ngoka iikolelela kethano lyedhipago lyaashiwike lyomo-2012.
“Oshiluli shika natango osha landulandje, alikana kwatheliindje omanga kuyele,” omufekelwa a shanga ngaaka potundi onti-15:51.
Potundi o-17:00 omufekelwa ngoka natango okwa shanga kutya
“Mehepa ozongumbiro arikaneye ndji kumbireye po ndji twaerereye kovahonge mbe kumbira ovandu”.
“ Onda pumbwa omagalikaneno alikana galikanenindje nenge falenindje kaasita mboka haya galikanene aantu.”
KENYA KAMBOWE
Category: