Ongundu yoongangala dha nika oshiponga dhoka dha halika moNamibia oshowo moAngola okwa lopotwa dhiiyaka mondjeedhililo moLubango moAngola.
Aanamibia mboka oya li ya tulwa miipandeko mondoolopa ndjoka okutameka muFebruali omolwa iipotha yeteyo lyombaanga. Mboka okwa lopotwa yiiyaka modholongo pokati komasiku ga-4 nomasiku ga-5 omwedhi nguka tuli.
MoNamibia oya halika omolwa iipotha ya yooloka nopolisi oya gandja ekunkililo kutya oongangala dhoka odha nika oshiponga noonkondo na otashi vulika dhi kale dha homata.
Mboka oya halika miipotha ngaashi omadhipago, oonkambadhala dhedhipago, okukala noondjembo oshowo iikuti yoondjembo, okwiiyaka mondjeeedhililo oshowo eteyo lyomagumbo nuulunga.
Aalumentu mboka oyo Mateus Shinombelo Petrus, 45, a za mOshikondiilongo mOshitopolwa shaShana na okwa tseyika nedhina ‘Kashamane’.
Gabriel Shinyemba Namupolo, 41, a za mOlupumbu IwaShinyemba na okwa tseyika nedhina ‘Chicken’, omanga Marius Iipinge Jackie, 33, a za mOnawa yaKillian na okwa tseyika nedhina ‘Cafude’.
omunamimvo 33, Tomas Hipewabedi Amweelo a tseyika nedhina ‘Tommy’ nenge ‘Ndjanane’ a za kEngela. Daniel Natangwe Mbishi, 28, okwa za mOkatele mOdibo oshowo David Simeon Aron, 34, a tseyika nedhina ‘Slow’,ngoka e li omvalele yaKwaza-sul moAngola ihe okuli omukwashigwana gwaNamibia.
ONational Central Bureau Lubango moAngola, okupitila moInterpol National Bureau mOvenduka, oya pula oshigwana shi gandje ekwatho mokuyambidhidha opolisi mekongo lyaalumentu mboka.
Oshigwana otashi kunkililwa opo kashi kambadhale okutula miipandeko aalumentu mboka ihe naya tseyithile opolisi yi li popepi nayo nenge Deputy Commissioner Kanyetu ko081 378 3818 nenge Detective Chief Inspector Sakarias Amakali ko081 249 9692.
ELLANIE SMIT
Category: