Ominista yUunamapya oya popi kutya nonando Namibia ota sindana mokukondjitha omukithi gwekondo nelaka, oshikondo shuuniimuna osha pumbwa okulongela kumwe opo ku vule okukandekwa omukithi ngoka moshilongo ashihe.
Omanga Namibia e na oomwedhi ndatu opo a kale a tseyithwa pambelewa kutya oshilongo osha manguluka okuza komukithi gwekondo nelaka, Minista yUunamapya, Omeya nIihwa
John Mutorwa, okwa lombwele aaleli yopamithigululwakalo kutya oya pumbwa okutaamba kutya omukithi ngoka ogwa nika oshiponga noonkondo na oguli eshongo enene koshikondo shuuniimuna.
Eindilo lyaMutorwa olya ningwa oshiwike shika pethimbo a popi pOmutumba gwokOmvula gwElelo lyAaleli yoPamuthigululwakalo moNamibia.
Omaitaalo gamwe gaaleli yopamuthigululwakalo kombinga yomukithi ngoka nkene hagu taandele, nkene hagu pangwa ogeli taga sitha uunye minister. Mutorwa okwa popi kutya aaleli mboka yamwe po okwa popi kutya omukithi ngoka kagu shi unene uupyakadhi nenge omukithi ngoka ohagu taandelithwa kuupouka onkene oonkambadhala dhoku gu kandeka itadhi kwatha sha.
Pahapu dhaMutorwa konima nkene omukithi ngoka gwa tukuka muMei nuumvo, ondjele yetaandelo lyomukithi oya shuna pevi, omanga inaku lopotwa iipotha iipe yetaandelo lyomukithi ngoka okuza momasiku o-22 gaJune nuumvo.
“Ngele onkalo ndjoka oya tsikile kwiikwatelewa kehangano lyUundjolowele wIinamwenyo lyoPauyuni, nena oshilongo otashi ka tseyithwa kutya osha manguluka okuza komukithi ngoka momasiku 22 gaJanuari omvula twa taalela,” Mutorwa ta ti.
Okwa popi kutya nonando oshilongo otashi sindana mokukondjitha omukithi, oshilongo natango kasha li megameno lya gwana onkene oshikondo shoka osha pumbwa okulongela kumwe mokukondjitha ezo lyomukithi ngoka moshilongo.
Okwa popi kutya shoka osho sha ningitha ekuthombinga lyaaleli yopamuthigululwakalo li kale lya simana moshikumungu shoka.
“Onga oonkuluhedhi dhevi lyaayehe, aaleli yopamuthigululwakalo oyo taya etitha unene epondolo moshikumungu shoka, paku lopota omikithi adhihe, nokukondjithila miilonga oondjindikila dheinyengitho lyiimuna okuza pehala limwe okuya pehala ekwawo nokugamenena po oonkalamwenyo dhaakwashigwana.”
Okwa popi kutya aaleli yopamuthigululwakalo oya pumbwa okutaamba ko nokuzimina kutya omukithi ngoka ogwa nika oshiponga noonkondo koshikondo shuuniimuna oshowo keliko lyoshilongo.
Mutorwa okwa popi kutya aaleli yopamuthigululwakalo naya kondolole aantu mboka taya tembukile momahala ngoka taya lele yo taya kwashilipaleke kutya iimuna yaantu mboka oya tuntilwa okuza komukithi ngoka.
Minista okwa pula aakwashigwana nayo ya lopote omikithi adhihe dhoka taya dhidhilike kaanambelewa yuundjolowele wiinamwenyo.
Okwa popi kutya omananathano kombinga yoongamba dhoka dhili pokati komalelo gamwe moshilongo otashi etitha okwaahethike pamwe kwetopolo lyevi lyuulithilo wiimuna naashoka osho tashi etitha aaniimuna yamwe yaka lithe iimuna yawo pondje yoshilongo ngaashi koKubata moAngola. Shoka osho tashi etitha unene etaandelo lyomikithi dhiimuna.
Mutorwa okwa popi kutya omukithi gwekondo nelaka oguli omutondi omunene gwiimuna molwaashoka ohagu shunitha pevi ondjele yongushu yiimuna na ohagu etithwa woo epato lyomalandithilo giimuna.
Minista okwa popi kutya muule woomvula 26 dha piti oshitopolwa shOnooli yoshilongo inashi dhidhilika omukithi ngoka kakele koshikandjohogololo shaMukwe naNdiyona moKavango East.
“Omukithi ngoka ogwa holoka ombadhiilila momasiku 11 gaMei mOshitopolwa shaHangwena naShikoto na ogwa etitha eidhilo lyomalandithilo giimuna ya thika poomiliyona 1.4.”
Mutorwa okwa popi kutya oshikondo shUundjolowele wIimuna osha yamukula paku gandja ontuntila koongombe dha thika po-800 000 miitopolwa mbyoka ya gumwa noongombe dha thika po-25 000 odha tuntilwa mesiku. Okwa tulwa miilonga omainda goondjila ga thika po-40 mIitopolwa ngaashi Zambezi, Kavango East, Kavango West, Ohangwena, Oshana, Oshikoto North, Omusati, Kunene North, nOshikandjohogololo shaTsumkwe mOtjozondjupa.
ELLANIE SMIT
Category: