Moonakutulwa miipandeko moka omwa kwatelwa omukuluntuskola gwoskola yopevi oya tulilwa miipandeko mOshikandjohogololo shaMpundja mOshitopolwa shaShana sho ya adhika nonyama yiiyamakuti ya yooloka.
Opolisi oya kwatako woo ohauto yombaki yoToyota yonomola
(N 8515 SH) oshowo iilongitho yimwe mbyoka ya longithwa mokulonga iimbuluma mbyoka ngaashi oolamba noondjembo.
Opolisi oya kwatako woo iikuti yoondjembo ya longithwa naambyoka inayi longithwa pehala li li popepi noongamba dhEtosha National Park.
Pauyelele wopolisi, omukuluntuskola ngoka pamwe nayakwawo oya hingi oshinano shookilometa 120 okuya mUumbugantu taya popi kutya otaya kongo iikuni yoprograma yokugandja oondya kaanaskola ihe elalakano lyawo oya yi kuukongo.
Oya etelele ondumba yiikuni mbyoka ya holeka onyama yiiyamakuti ya thika pomulongo oshowo oondhila mbali.
Omupeha kOmufala William Peter, ngoka e li omukwateli komeho gwoshitopolwa oshitiyali shomahwahwameko gopolisi gokukondjitha uukongo waali paveta, ngoka ga tameke mesiku lyotango lya Septemba sigo omomasiku 30 gaNovemba okwa popi kutya opolisi oyali ya uvu omitopelo dhoondjembo mEtosha ongulohi yEtiyali nopolisi oyali ya yi molukongo lyaakongo mboka.
Peter okwa popi kutya opolisi oya longo nuudhiginini mokukonga aafekelwa mboka uusiku awuhe sigo osho ye ya kwatele pOskola yoPevi yaMulunga mOmpundja.
“Omatulo miipandeko ogendji oga tegelelwa kuyele sho omakonaakono taga tsikile.”
Okwa gandja uuyelele kutya monena aantu ya thika po-20 oya tulwa miipandeko muule wiiwike itano taya tamanekelwa uukongo waa li paveta.
Okwa popi kutya iilonga yawo kayi shi owala okukandeka uukongo woompanda noondjamba ihe iiyamakuti ayihe. Omupeha kOmufala okwa holola kutya elongelo kumwe lyawo nUuminsiteli wOmidhingoloko nOmatalelepo mokukondjitha uukongo mboka olya longo sha shomupondo molwaashoka inaku lopotwa we uukongo woompanda nenge ondjamba okuza pehulilo lyaAguste kakele owala kuukongo wiiyamakuti yilwe.
“Aantu yamwe otaya ningi uukongo mboka opo ya lye onyama ihe yamwe oya hala okulanditha. Aantu oya pumbwa okuhololelwa uuwinayi wuukongo mboka na kutya ohawu shunitha pevi ngiini eliko lyoshilongo oshowo okushunitha pevi omuyalu gwiinamwenyo mbyoka ya gamenwa.”
PLACIDO HILUKILWA
caption
YA ADHIKILILA: Aafekelwa yane mboka ya tulwa miipandeko oshowo ohauto ndjoka ya longitha.
ETHANO: PLACIDO HILUKILWA
Category: