Omukwatakanithi gwOngundu yoSwapo mOshitopolwa shaShana, Erastus Kapolo, okwa holola euvo lye lyonayi omolwa aakiintu oyendji mboka inaya kutha ombinga momahogololo gookandidate dhoka tadhi ka kalele po ongundu momahogololo gopashigwana gaaleli yiitopolwa noondolopa ngoka kwa tegelelwa ga ningwe momwedhi twa taalela.
Pethimbo a ningwa naye oonkundathana koshifokundaneki shoNamibian Sun konima owala yesiku limwe sho kwa ningwa omusholondondo gwaamboka taya ka kalelapo ongundu momahogololo ngoka, Kapolo okwa popi kutya ongundu yawo oyali ya tegelela opo kehe moshikandjo mu ze aakiintu yaali naalumentu yaali, ihe iikandjo owala ine yomiikandjo o-11 mbyoka yi li mOshitopolwa shaShana ya gandja omuyalu ngoka.
"Iikandjo ikwawo omwa hogololwa owala omukiintu gumwe nenge inamu hogololwa. Ota tu kondjitha okutula miilonga omukalo guuthikepamwe momalelo ihe aakiintu itaya kutha ombinga. Inandi hala oku ya lundila kutya pamwe inaya pyakudhukwa," Kapolo ta ti.
Kapolo okwa popi kutya, opo omuntu a vule okukutha ombinga momahogololo ngoka oku na okukala a futa uukwashilyo we uule woomvula 10 nenge ntano, naashoka otashi vulika osho sha etitha aakiintu ya kale inaya kutha ombinga.
"Aakiintu oyendji ihaya longo onkene itaya vulu okufuta uukwashilyo mboka. Nonando nee omolwa omatompelo gontumba nogongandi otwa pumbwa ekuthombinga lyawo," Kapolo ta ti,.
Omukiingu owala gumwe ngoka a hogololulwa na okuli momusholondondo gwaahogololwa, kansela gwaKatana, Rosalia Shilenga.
Kapolo okwa popi kutya nonando ookansela oyendji oya hogolululwa onga aakalelipo yongundu pethimbo lyomahogololo ngoka taga ningwa momasiku 27 gaNovemba, omu na owala iipala iishona mbyoka iipe.
Oonakuhogololwa aape ongaashi Andreas Uutoni gwaNgwediva, Abraham Alfeus gwaNdangwa Rural, Elia Irimari gwaNdangwa Urban naJohannes Andreas gwoShakati West.
Uutoni, ngoka e li omupopiliko gwElelo lyOndoolopa yaNgwediva okwa pingenepo kansela Abisai Vinia, ngoka a li a kutha ombinga momahogololo ihe okwa ndopa okumona omawi ogendji.
Alfeus okwa li nale kansela gwaNdangwa ihe okwa kutha ombinga momahogololo onga kansela gwaNdangwa Rural sho iikandjo mbyoka ya ningwa iyali.
Okansela yamwe mboka ya hogolululwa ongaa Shilenga (Okatana), Gerson Kapenda (Okaku), Joseph Mupetami (Okatyali), Adolf Uunona (Ompundja), Lot Kuushomwa (Oshakati-West), Andreas Amundjindi (Uukwiyu) naPaulus Amutenya Ndahafa (Uuvudhiya).
Omusholondondo gwookandidate mondoolopa yaNdangwa Urban omu na Abed Paulus, Anna Itope, Saima Namukwambi, Andreas Kalumbu, Paavo Amweele, Apollo Dengeinge naFenni Nanyeni.
Ondoolopa yaNgwediva oya kalelwa po kuUlalia Katonyala, Petrus Malakia, Angelina Angula, Johannes Shitundeni, Jason Asino, Naemi Amuthenu naMaria Kavalela omanga Oshakati ya kalelwapo kuGabriel Kamwanka, Angelius Iyambo, Johannes Shilongo, Onesmus Shilunga, Katrina Shimbulu, Ndamononghenda Hamunyela naLoise Shivolo.
MERJA IILEKA
Category: