Elelo alihe lyondoolopa olya kuthwa miilonga sho lya ndopa aniwa okugwanithapo omilandu dhepangelo, sha landula woo omakonaakono ngoka ga ningwa kuuministeli na oga holola kutya elelo ndyoka otali longo iilonga yaahena uuyuki konima yomiyelo dha pata.
Oshikumungu shoka osha hololwa kutya iita yi li pokati kookansela nale nepangelo, nookansela mboka oya lundile epangelo kutya otali kambadhala okuteya po elelo ndyoka molwaashoka otali kwa telwa komeho kongundu yompilameno.
Nonando ongaaka, sho kwa ningwa omakonaakono, Okabinete oka gandja elombwelo kuMinista gwOmayambulepo gIitopolwa nOondolopa, Sophia Shaningwa oshowo Attorney-General Sacky Shanghala opo ya vule okulikola ko iimaliwa mbyoka ya longithwa pambambo koonakuninga oshihakanwa shekutho miilonga.
Onamibian Sun oyi uvite kutya, Shanghala okwa mana iilonga ye nomonena epeko ndyoka oli li miikaha yaMinista Shaningwa.
Nonando otaku ninga omakonaakono ngoka, Johannes Hamutenya, Hendrina Tuli Gebhardt (ayehe yoSwapo), Vincent Kahua gwoNudo oshowo Christian Nanuseb gwoUDF oya hogololwa opo ya ka kuthe ombinga momahogololo gElelo lyIitopolwa noondolopa mOshikandjohogololo shaMaruru.
Pethimbo ya kuthwa miilonga Kahua okwa li mayola gwaMaruru omanga Nanuseb a li omunashipundi gwelelo.
Nanuseb naHamutenya oya hogololwa koongundu dhawo ya kalelepo oongundu dhawo momahogololo gopashitopolwa omanga Kahua naGebhardt ya hogololwa opo ya kalelepo oongundu dhawo palelo gondoolopa.
Inashi yelamo natango kutya omupeha mayola
Albertus !Naruseb ngoka e li oshilyo shOngundu yoRally for Democracy and Progress (RDP) oshowo Phillip Nghipandulwa gwoSwapo mboka ya kuthwa miilonga pamwe nayakwawo otaya tokola natango okuya komeho nopolotika.
Omupresidende gwoUDF Apius !Auchab okwa lombwele oNamibian Sun kutya omakutho miilonga ngoka oga hwahwamekwa kopolotika.
“Shoka tashi popiwa kutya mboka oya longithwa iimaliwa pambambo otashi vulika shi kale oshili ihe kape na uumbangi. Aantu mboka inaya pangulwa mohofa, Okabinete ka keshi ompangulilo,”!Auchab ta ti.
“Swapo okwa hogolola ookansela ye mboka ya kuthwa miilonga. Gebhardt okuli ponomola yotango momusholondondo gwaMaruru, shika otashi ulike kutya kape na uukwashili washa miipotha mbyoka tayi tamanekelwa mboka.”
Amushanga-Ndjai gwOngundu yoNudo, Meundju Jahanika na ye okwa popi kutya “Ngele omuntu okwa pogola nena oku na okufalwa kompangu. Sigo onena inandi mona iipotha yasha tayi tamanekelwa elelo ndyoka lya kuthwa miilonga. Otwa uvu kutya okwa ninga omakonaakono ihe sigo onena inatu uva iizemo yomakonaakono ngoka ga ningwa. Omakutho miilonga ngoka otaga hwahwamekwa kopolotika sigo uuna a monika ondjo mompangu kape na shoka tashi yi moshipala oNudo opo yi hogolole Kahua onga okandidate kongundu,” Jahanika ta ti. Jahanika okwa gwedha po kutya omanga Kahua ina pangulwa,Swapo okwa fala momutumba gwoPashigwana Marina Kandumbu ngoka a li a monika ondjo miipotha yuulingilingi mOmpangu yaRundu omvula ya piti.
Oshilyo shOmutumba gwoPashigwana shOngundu yoNudo osha popi kutya kashi li nawa ngele epangelo otali kondjitha okulwitha uulingilingi ihe otali tula moombelewa dhoshigwana oongangala dhoka dha monika oondjo.
Sho ya pulwa ngele aantu mboka ye na ondjokonona dhomiyonena otaya vulu okukutha ombinga momathigathano gomahogololo, Okakomisi kOmahogololo oka yamukula kutya oshi li oshinakugwanithwa shoongundu dhopolotika opo dhi konaakone nawa aahogololwa yadho.
ELVIS MURARANGANDA
Category: