Konima yoomvula 16 dha piti sho kwa ningilwa omatungo gepangelo oshiponokela dhopaukulo momasiku ga-2 gaAguste , 1999, oonakuninga oshiponokela shoka onkene taya lala oondjodhi dhemanguluko lyaCaprivi.
Dhoka odha popiwa kOmufali gwIihokolola kOmpangu gwEpangelo Taswald July sho a popi pethimbo lyoompata kombinga yoshipotha shoka mOmpangu yoPombanda mOmaandaha.
Oompata dhoka odha pulakeniwa omanga inaku gandjwa egeelo kaalumentu ya thika po-30 mboka ya monika ondjo moshipotha shiilonga yuukulo, omadhipago noonkambadhala dhedhipago moshipotha shetendeko lyOshitopolwa shaCaprivi kuNamibia.
Aantu yahetatu oya dhipagelwa moshiponokela shoka.
Omwedhi gwapiti Omupanguli mOmpangu yoPombanda Elton Hoff okwa mangulula ookwatwa nale 35 dhomookwatwa 65 moshipotha shoka.
July ohela okwa dhana ekwatwawi lyoonkundathana dhaMishake Muyongo ngoka e li omuleli gwoUnited Democratic Party (UDP) oshowo oCaprivi Liberation Army (CLA).
Oonkundathana dhoka odha ningwa naMuyongo momasiku ga-3 gaAguste ,1999 esiku limwe konima yoshiponokela shoka sha ningilwa omatungo gaNBC oshowo osasiyona yopolisi moKatima Mulilo nOkamba yAakwaita yaMpacha.
Onga uumbangi moshipotha shoka, July okwa gandja okopi yokafokundaneki koFreedom News, oonkundana dhoka dha kuthwa kepandja lyopainternet lyoCLA.
Mokafo moka, Muyongi okwa popi kutya ina pumbwa okuthiminwapo kuSwapo molwaashoka ita kondjele Namibia ihe ota kondjele oCaprivi.
“Ngele Namibia oku na omalimbililo nge ondi na aayambidhidhi moCaprivi oshike ita pitika eningo lyomahogololo moshitopolwa shoka?” Muyongo ta ti. Muyongo okwa popi mokafo moka kutya oCaprivi ka keshi oshitopolwa shaNamibia.
Komufala, Licious Shimutwikeni, omukomeho gwomakonaakono gopolisi moshipotha shoka okwa gandja uumbangi kutya natango ope na iilonga yopaukulo tayi longwa moshitopolwa shoka.
Okwa popi kutya oCaprivi Concerned Group natango otayi popi kutya Oshitopolwa shaZambezi kashi shi oshitopolwa shaNamibia.
“Opo tu kalekepo egameno nokukwashilipaleka kutya itaku holoka we iiponokela yopaukulo, otatu kondolola omainyengo agehe goorebele.”
Pahapu dhe, edhilaadhilo lyokukuthako Caprivi kuNamibia olye ya po mo-1992 moka Ongundu yoCLA ya totwa.
“Ngaka omaumbangi ngoka twa monopo konima yoshiponokela shoka sha ningwa momasiku ga-2 gaAguste, 1999.”
Sho a yamukula komapopyo kutya opolisi oya kala yi na ontseyo yekalepo lyoCLA oshowo oshiponokela shoka sha ningwa onkene epangelo olyo tali pelwa ombedhi omadhipago ngoka neyonagulo lyomaliko, Shimutwikeni okwa popi kutya ombedhi otayi pewa Ongundu yoCLA.
Okwa popi kutya ita vulu okuyamukula komapopyo kutya epangelo olyo lya pitika oshiponokela shiningwe. “Ngame otandi yamukula owala shiikwatelela komakonaakono ngoka ngame nda ningi.”
Okwa gwedha po kutya ita gandja ekwashilipaleko kutya shoka sha ningwa mu-2 gaAguste, 1999 itashi endululwa we.
FRED GOEIEMAN
Category: