Omupresidende Hage Geingob okwa tsu omukumo aaleli yopamuthigululwakalo opo ya hulithepo nokuya moshipala omikalo dhimwe po dhopamithigululwakalo dhoka tadhi imbi e yo komeho lyomayambulepo na otadhi etitha etopokauko.
Omuleli gwaNamibia okwa popi ngaaka pethimbo lyOmutumba omuti-18 gwokOmvula gwElelo lyAaleli yoPamuthigulukwalo ngoka gwa ningilwa mOndangwa. Geingob okwa popi kutya nonando omikalo dhimwe dhopamuthigululwakalo odha simana, odha pumbwa okutalululwa nokukwashilipaleka kutya odhili tuu mondjila.
“Dhimwe dhomomikalo dhoka omukalo guuthiga ngoka olundji hagu thigi moluhepo omukiintu naanona molwaashoka iinima yanakusa ohayi naakwanezimo. Kombinga yoshipopiwa shegameno lyaakiintu otandi indile ehulithepo lyomiyonena nomadhipago ngoka taga ningilwa aakiintu kaaholike yawo,” Geingob ta ti.
Geingob okwa popi kutya Ompango yOmalelo gAaleli yoPamuthigululwakalo otayi yambidhidha enkondopeko lyaakiintu na okwa kunkilile kutya oshigwana itashi vulu okuyambukapo kakele uuna aakiintu ya pewa oompito ngaashi dhoka tadhi pewa aalumentu.
“Shoka otashi popilwa kontopolwa 3, okantopolwa G mOmpango yElelo lyoPamuthigululwakalo, ndjoka ya pa omalelo gopamuthigululwakalo oshinakugwanithwa shokuhwahwameka uuthikepamwe momalelo gopamuthigululwakalo.”
Pahapu dhaGeingob, onkuluhedhi odho dha kwatela kumwe aakwashigwaa ihe oonkuluhedhi dhoka dha talikako kutya odho dhi na oonkondo nena odhili dha nika oshiponga na odhili uuzigo koshigwana.
Omuleli okwa pula Aanamibia ya tule miilonga omidhigululwakalo momukalo ngoka tagu simaneke woo uuthemba wa yakwawo nokugandja woo ompito keyambulepo lyoshigwana.
“Momukalo ngoka otatu tungu po oshigwana shi na omidhigululwakalo noonkuluhedhi paukumwe pwaahena eteyathanepo,” Geingob.
Omunashipundi gwElelo lyAaleli yoPamuthigululwakalo, Omukwaniilwa gwaNdonga, Kauluma Elifas okwa popi kombinga yiikumungu mbyoka ya taalela omalelo gawo.
Yimwe yomwaambyoka omwa kwatelwa onkalo yoshikukuta ndjoka tayi nayipalitha onkalamwenyo yaakwashigwana, elongitho nayi lyiikolitha, uulunga wiimuna, oontamanana dhoongamba oshowo omuyalu omunene gwoongeleka dhopashinanena.
“Elelo lyoPamuthigululwakalo olya limbililwa komuyalu omunene gwoongeleka dhopashinanena moshilongo. Dhimwe dhomoongelelka dhika odhililepo owala okuninga iimaliwa nokupukitha aakwashigwana nomahunganeko giifundja. Otandi indile epangelo lyetu okupitila mElelo lyoPamuthigululwakalo opo li konaakone oongeleka dhoka,” Kauluma ta ti. Kauluma okwa gwedha po kutya elongitho nayi lyiikolitha mokati kaakwashigwana olya ninga omukalondjiigilile, naakuluntu ohaya dhigipo omagumbo oongula oonene nokugaluka owala omausiku.
“Omukalo ngoka oguna oshilanduli oshiwinayi koofamili naanona otaya ningi iihakanwa yomamonitho giihuna. Oshi li oshinakugwanithwa shetu onga aaleli yopamuthigululwakalo tu ungaunge noshikumungu shelongitho nayi lyiikolitha mokati kaalelwa yetu.”
Kauluma kwa longitha ompito ndjoka nokupopya kutya eyopombanda lyomahala gomalukalwa ngoka taga totwapo komalelo giitopolwa otali etitha opo omalelo gopamuthigululwakalo ga kanithe iiyemo mbyoka gali haga mona okuza kaakwashigwana.
MERJA IILEKA