Omahogololo gongundu ndjoka pankatu yopaitayi, iikandjo niitopolwa okwa lopotwa taga kwatelwa komeho komalundilo gokwaahena uuyuki momahogololo.
Omadhina gaahogololwa oga tumwa koombonge oonene dhongundu mOvenduka niilyo yilwe oya popi kutya itayi popilwa molwaashoka oya li tayi yambidhidha Omukomeho nale gwEwawa lyAanyasha mOngundu yoSwapo ngoka atidhwa mongundu Elijah Ngurare.
Poompito dhimwe aanapolotika oya lundilwa kutya otaya kengelele nomashainokaha gaaleli yopombanda omanga yamwe kwa lopotwa taya yaka omawi gaahogololi.
Okwa popiwa kutya aahogololwa yamwe mbela ‘oya gu megulu’ molwaashoka inaya hogololwa paikandjo nenge paitayi yawo ngaashi tashi uthwa kelelo lyongundu.
Omahogololo ngoka kwa tegelelwa ga ningwe momwedhi twa taalela oga popiwa kuyamwe po kutya oge na oshilonga noonkondo molwaashoka otaga gumu konkalo ye gandjo lyomayakulo kaakwashigwana ngaashi omeya, olusheno, oondjila oshowo omahala gokutunga omagumbo.
Yamwe oya ulike omunwe Ongundu yoSwapo molwaashoka inayi talako unene esimano lyehogololo lyaahogololwa mboka haya hogololwa paikando nopaitopolwa.
Omupopiliko gwongundu Helmut Angula okwa popi kutya itashi popilwa sho omukalo gwawo gwomahogololo gwa kwatwako koolopota dhoka dhuukwamuhoko, okwaahena uuyuki oshowo iilyo yimwe mbyoka ya tindilwa ompito yokuhogolola.
Aakuthimbinga pethimbo lyomahogololo goPashitopolwa shaKhomas ngoka ga ningwa mehuliloshiwike , oya lombwele oNamibian Sun kutya omilandu dhimwe inadhi landulwa pethimbo kwa ningwa omahogololo ngoka.
Aakuthimbinga oya holola kutya oya lombwelwa owala ya hogolole sho ya piti osheelo shoshinyanga shiigongi moka mwa ningilwa omahogololo ngoka.
Omukwakatanithi gwOshitayi shAakokele mOngundu ndjoka, Eliphas Shipanga naye okwa shangele Mbumba omukanda a holola kutya ina nyanyukilwa omukalo ngoka gwa longithwa mokuhogololola aakalelipo yongundu mOshikandjo shoVenduka yomUuzilo.
Omupopiliko gwOshitayi shaSam Nujoma moSwakopo Sioni Iikela okwa pula kutya omolwashike edhina lye lya kuthwamo momusholondondo.
“Omadhina 15 ogali ga gandjwa koombelewa oonene ihe omusholondondo sho gwa galuka ogu na owala omadhina 14. Kandi shi shi kutya omolwashike edhina lyandje lya kuthwamo,” Sioni a lombwele oNamibian Sun.
“Onda lombwelwa kutya edhina lyandje olya kuthwamo molwaashoka ngame omuntu gwaNgurare. Sho nda wayimine ongundu inandi yi wayimina opo ndi mone ompito yuuleli.”
Okwa pula opo aantu ayehe mboka yiiyadha ya kuthwamo momusholondondo unene aanyasha opo ya ninge omahwahwameko nokukwashilipaleka esindano lyongundu pethimbo lyomahogololo.
“Ina ya tilithwa komapopyo kutya aantu ayehe yaNgurare otaya kuthwa uuleli. Omolwashike aantu ye na okutalika onga aantu yaNgurare. Ngurare okwa ningi ongundu yopolotika uunake? Shika osha etitha omaipulo mungame kutya Ngurare okwa tidhilwa shike.”
Ewawa lyAanyasha mOngundu yoSwapo, mOkahandja oshiwike sha piti olya gandja omanyenyeto gawo kuAmushanga- Ndjai gwoSwapo Nangolo Mbumba omolwa omahogololo gopashikandjo ngoka ga ningwa moKahandja .
“Aakalelipo yewawa ndyoka inaya pitikwa ya ye mehala moka mwa ningilwa omahogololo. Omatompelo ngoka ga gandjwa inaga longithwa momawawa galwe ngaashi ndyoka lyaakiintu ndyoka lya pitikwa opo li ye meni lyehala ndyoka. Aanyasha yakwetu yomOtavi oya pitikwa okuya meni lyehala ndyoka, epulo oli li mpaka kutya omolwashike tse inatu pitikwa,” ombapila ndjoka ya shangelwa Mbumba ya holola.
Aanyasha mboka oya popi kutya oya sithwa ohoni na inaya pulakenwa pethimbo ya holola omaiyuvo gawo.
“Omunashipundi gwomutumba ngoka Steve Biko Booys, okwa popi kutya moKahandja kamu na elelo lyAanyasha omanga tse twa hogolola kaanyasha yomoshikandjo shetu.”
Omukandanyenyeto gumwe ngoka gwa tuminwa Mbumba oga zi kuMayola gwaKahandja Valerie Aron nOmupopiliko gwoshikandjo Victor Nakapandi mboka ya nyenyeta okwaahena uuyuki kwa longwa pethimbo lyomahogololo ga ningwa mOshitayi shaNehale, Utoni Nujoma naAnton Lubowski.
ELVIS MURARANGANDA
Category: