Aanyasha mboka ya tseyika kutya ‘aanona yekondjelomanguluko’ mboka ya unga oontanda pOombelewa dhOngundu yoSwapo mOshitopolwa shaShana mOshakati otaya lundilwa kutya otaya kutha ombinga melongo lyiimbuluma, mwakwatelwa omuyeka neehameko ndyoka lya falitha sigo omoshipangelo omulandithi gwiifokundaneki gumwe.
Alexander Gabriel, 30, ngoka ha landitha iifo momapandaanda gaShakati okwa popi kutya okwa li ta shuna kegumbo omutenya gwOmaandaha sho a ponokelwa kongundu yaantu yaheyali mboka ta fekele kutya oye li aanona mboka.
Oye mu thangagula omanga inaye mu yeka iimaliwa mbyoka a longo esiku ndyoka.
“Onda li mondjila yandje okuya kegumbo tandi ende tandi thikama molwaashoka onda li tandi zi omukota. Omanga tandi ende onda uvu omuntu gumwe a pula kutya otandi zi peni, ihe inandi nongela shoka tashi holoka po, onda mono owala nda ponokelwa na onda thangwa sigo nda kala kandi weteko nawa. Sho nda penduka onda mono ongundu yaaponokeli yandje taya tondola yuuka mootenda dhoka dhi li meni lyOombelewa dhoSwapo niimaliwa yandje yooN$370 mbyoka nda longa esiku ndyoka oya yiwa nayo. Onda yi koshipangelo opo ndi ka mone epango. Ontulo yandje nepunda otali ehama nomundohotola okwa lombwelendje opo ndi shune nena (mEtitatu) koshipangelo,” Alexander ta ti.
Sho a ningilwa omapulaapulo, omupopiliko gwongundu yaanona mboka Onesmus Paulus, okwa popi kutya ngoka omalundilo gowala.
“Kehe ongangala otayi vulu okulonga omuyonena ngoka. Shaashi owala kutya omuyonena ogwa ningilwa popepi nehala mpoka tuli itashi ti kutya otse twe gulongo.”
Nonando ongaaka omukwatakanithi gwOngundu yoSwapo moshitopolwa shoka Erastus Kapolo okwa popi kutya ita kala a kumwa ngele shoka tashi popiwa oshili.
“Aanona mboka aantu aawinayi,” Kapolo ta ti.
Okwa popi kutya nonando aanona mboka oya unga oontanda poombelewa dhawo kaye li kohi yekondololo lyawo.
“Kaye li mekondololo lyetu. Ohatu ya mono taya zimo nokuyamo ethimbo kehe na ita tu vulu okupopya kutya otaya zi peni,” Kapolo ta ti.
Lyopokati mpoka aakalimo yomOkandjengedi oya popi kutya aanona mboka ohaya kala taya umana omolwa omalundilathano guulunga.
PLACIDO HILUKILWA
Category: