Ngoloneya gwOshitopolwa shErongo okwa holola omaiyuvo ge omolwa omukakena omule guulethimbo gwekutho miilonga Elelo lyOndoolopa yuaMaruru.
“Ondi na omalimbililo kombinga yondoolopa yaMaruru ndjoka tayi longo yaahena elelo. Itandi vulu okulela oshitopolwa moka muna ondoolopa kadhi na omalelo,” Cleophas Mutjavikua ta ti.
Ngoloneya okwa popi ngaaka pethimbo lyomutumba ngoka gwa ningwa naakalimo yomOmaruru mOshinyanga shIigongi shaOzondje.
Pethimbo lyoshigongi shoka a ningi naakwashigwana, Mutjavikua okwa lombwele aakwashigwana kombinga yomayambulepo ngoka kwa tegelelwa ga tulwe miilonga mondoolopa ndjoka mo-2016.
Aakwashigwana oye mu pula omapulo ga yooloka na oya popi kombinga yomaiyuvo gawo kiikumungu yomayambulepo gopankalathano neliko.
Gumwe gwomookansela mboka ya kuthwa manga miilonga mondoolopa ndjoka, Albertus !Naruseb, okwa pula Mutjavikua kombinga yolopota yomakonaakono ngoka ga ningilwa Muni gwOndoolopa yaMaruru mo-2014, kelombwelo ndyoka lya gandjwa kOminista yoshikondo shOmalelo gOondoolopa nEpangelo lyoPaitopolwa, Omagumbo nEyambulepo lyokOmikunda pethimbo ndyoka Charles Namoloh .
!Naruseb okwa popi kutya oshizemo shomakonaakono ngoka ga ningwa osha pumbwa okutseyithilwa oshigwana
Momasiku 16 gaDecemba mo-2013, Namoloh okwa kutha miilonga iilyo yelelo lyaMaruru ya thika puiheyali na okwa gandja elombwelo kehangano lyomayalulo gopashimaliwa liithikamena opo li ningile omambo gopashimaliwa gondoolopa ndjoka omakonaakono.
Moonakukuthwa miilonga omwa kwatelwa ookansela yaali yeli iilyo yOngundu yo Rally for Democracy and Progress (RDP), oshilyo shOngundu yoUnited Democratic Front (UDF) oshowo Mayola gwaMaruru , Vincent Kahua ngoka e li oshilyo shOngundu yoNational Unity Democratic Organisation (Nudo). Ookansela yalwe yatatu oye li iilyo yOngundu yoSwapo.
Ookansela mboka oya kuthwa miilongwa pwahena ondjambi. Namoloh okwa ulike Linus //Garoeb, a ninge omusilishipwiyu gwondoolopa ndjoka.
Ongulohi yEtine, Mutjavikua, okwa popi kutya oku na omaipulo kombinga yonkalo yondoolopa ndjoka.
Aakwashigwana yamwe oya nyenyeta omolwa onkalo yomategelelo mokati kaanona aashona ndjoka tayi londo pombanda mondoolopa, edhigepo lyooskola, okwaahena iilonga mokati kaanyasha, ompumbwe yomahala gokwiinyanyudha, ompumbwe yevi lya wapalekwa oshowo onkalo ya nayipala moka tamu adhika omawendo gaOzondje.
Ngoloneya okwa kuthako omanyenyeto gaakwashigwana ihe okwe ya pula woo opo ya hulithepo okunyenyeta yo ya tameke oopoloyeka dhokwiimonena iiyemo.
Okwa pula aanyasha moshitopolwa she ya fale kombelewa ye kehe oondungethaneko dhoka ye wete kutya otadhi vulu okuya kwathela.
Mutjavikua okwa pula muni gwaMaruru opo uunganeke esiku lyokuwapaleka omawendo gaOzondje, newapaleko ndyoka otali ningwa kohi yetonatelo lye.
Okwa popi kutya ompumbwe yevi lwa wapalekwa lyokutunga omagumbo oyi li omukundu gwopashigwana naaleli otaya longo ya manamo opo ku vule okukandulwa po omukundu ngoka.
NAMPA
Category: