Omupresidende gwoNamibian Exile Kids Association (NEKA), Benitha Nakaambo, okwa yamukula komapopyo ‘gaanona yekondjelomanguluko’ mboka ya unga oontanda mOndangwa kutya okwe ya idhimbika.
Ongundu yaanyasha ya thika po-29 oya unga oontanda polwaamba lwendiki lyomadheulo gopakwaita naapolisi lyaRuben Danger Ashipala Police Centre okutameka momasiku 30 gaAguste, esiku ndyoka mboka taya tameke omadheulo kwa li kwa tegelelwa yiilopote pendiki.
Kwiikwatelelwa koohapu dhaanyasha mboka ya za mOshitopolwa shaHangwena, omadhina gawo oga li momusholondondo gwaamboka ya li ya pumbwa okwiilopota mendiki ndyoka ihe lwanima omadhina gawo oga pingenwapo pwaahena omatompelo gasha.
Nakaambo okwa popi kutya okwa li a yi kEenhana mOshitopolwa shaHangwena iiwike ine ya piti na okwa yi moonkundathana naanambelewa yOpolisi mboka ya yelitha kutya omolwashike omadhina gawo ga kuthwa mo.
“Uupyakadhi mboka ndi na aantu mboka inaya hala okupopya oshili. Oya popi kutya inaya lombwelwa ihe onda ningi omutumba naamboka omadhina gawo ga pingenepo na onde ya tseyithile kutya osha ningilwa shike,” Nakaambo.
Nakaambo okwa yamukula kutya nonando kashi shi oshinakugwanithwa shoNEKA okukongela aanyasha mboka iilonga, ehangano olyiipyakidhila nokuya moonkundathana nepangelo opo ku yambulwepo oonkalamwenyo dhaanyasha mboka.
“Otu uviteko kutya oyuuvitithwe nayi komulandu, ihe natse otwa lulilwa. Ita tu tsikile nokupewa oombedhi omolwa onkalo yawo kutya ita tu ningi sha. Okupopya oshili NEKA okwa kambadhala mokumonena oyendji yomaanyasha mboka iilonga ihe kehulilo aluhe oye ha pewa ombedhi,” Naakambo ta ti.
Pahapu dhaNaakambo, shoNamibian Correctional Services ya pula NEKA opo a gandje omadhina gaanona yekondjelomanguluko ya thika po-250 opo yapewe iilonga, osha yelithwa kutya epangelo olya hala okuhulitha po omanyenyeto neungo lyoontanda okuza kaanyasha mboka.
Uuwanawa mboka owa pewa mboka ya li ya unga oontanda mOvenduka nEenhana.
Otashi ulike kutya omuntu ngoka a pewa oshinakugwanithwa shokukuta aantu mOshitopolwa shaHangwena okwa gandja owala omadhina gaamboka ya li komagumbo na okwa ndopa okugandja omadhina gaamboka ya li ya unga oontanda.
“Omolwa ompumbwe yoonzo inatu vula okukwashilipaleka omusholondondo gomadhina ngoka ga zi kOhangwena ngaashi twa ningi mOvenduka nomusholondondo ngoka ogwa pewa nokutaambwa kUuministeli wOpolisi. Konima sho omusholondondo gwa ningwa opo owala twa dhidhilike kutya omadhina ngoka ga gandja ogaamboka ya li yahala uukwashilyo,” Nakaambo ta ti.
Okwa popi kutya okwa li a kambadhala okukandulapo uupyakadhi ihe pethimbo ndyoka mboka ya li momusholondondo oya pewa nale omikanda dhiilonga okuza kuuministeli.
“Elalakano olya li okuyeleka ookamba dhoka dha ungwa kaanyasha mboka, otwa li twa pumbwa okukuthamo omadhina 24 nokugapingenapo nomadhina gaamboka ya li ya unga oontanda mEenhana, nuupyakadhi opo wa zilile mpoka.”
NEKA okwa popi kutya omadhina ngoka ga pingenwapo oga gandjwa kuuministeli wulwe.
“Otaya nuka nuka owala ya fa ya ethiwa, ihe hasho ngaaka. Otwe ya lombwela nale kutya omadhina gawo otwe ga gandja na otaya ka pewa iilonga, ihe pehala otaye tu pe uusama.”
MERJA IILEKA
A GANDJA OMBINGA YIMWE YUUKWASHILI: NEKA okwa popi kutya aanona yekondjelomanguluko mboka ya unga ontanda mOndangwa, itaya popi oshili.
ETHANO : MERJA IILEKA
Category: