‘Aanona yekondjelomanguluko’ mboka yaahena iilonga na oya unga oontanda poombelewa dhOngundu yoSwapo dhOpashitopolwa mOshakati oya gandja omukandanyenyeto gwawo kuNgoloneya gwOshitopolwa shaShana,Clemens Kashuupulwa.
Kashuupulwa okwa talelepo aanona mboka mEtitano lya piti na okwa longekidha okuninga omutumba nayo nena mombelewa ye.
Ongundu yaanyasha mboka ya valelwa mekondjo pondje yoshilongo ya thika pe-100 oyeli oshitopolwa shaanyasha ,mboka ya ningi omahololomadhilaadhilo oomvula dha piti na oya li ya shuna komagumbo konima ya lombwelwa kutya naya shune komagumbo omanga epangelo tali kandulapo omaupyakadhi gawo nokutala komanyenyeto gwawo. Ngashiingeyi oya popi kutya otaya kala poombelelwa dhoSwapo sigo ya pewa omayamukulo komapulo gawo.
Oya popi kutya oya kala ya tegelela opo yapewe iilonga kepangelo uule womimvo heyali dha piti, nomonena oya loloka okupewa omaiuvaneko giifundja.
Oya popi kutya oya li ya lombwelwa ya kale komagumbo sigo omaupyakadhi gawo ga kandulwa po ihe oya mono kutya yakwawo mboka inaya shuna komagumbo na oya kala ya unga oontanda mEenhana mOshitopolwa shaHangwena oshowo mOvenduka oya pewa iilonga.
Uupyakadhi wumwe mboka ya holola, yamwe po mboka ya li ya ithanwa kiilonga oya a dha omadhina gawo ga pingenwa po sho yakiilopota kiilonga.
“Otwa loloka uulingilingi moshilongo shika. Sigo uunake tu na okukala twa tegelela komagumbo. Otwa hala iilonga opo tu yambulepo oonkalamwenyo dhetu,” aanyasha mboka ya popi.
Oya popi kutya otaya ka kala yanyanyukilwa iilonga kehe taya pewa mepangelo molwaashoka kaye na ehogololo.
Sho a popitha aanyasha mboka, Kashuupulwa okwa popi kombinga yiikumungu ya yooloka na okwa uvaneke ta ningi nayo omutumba mombelewa ye nena.
Okwe ya lombwele kutya uuministeli wumwe ngaashi Uuministeli wOpolisi ihawu taamba mboka ye na ondjokonona yiimbuluma na ohawu pula woo omakonaakono gopaunamiti naashoka osho hashi etitha yamwe mboka yali ya ithanwa kiilonga ya kale inaya pewa iilonga ihe okwa popi kutya itashi vulika ya kuthwemo momusholondondo inaya pewa omatompelo.
Kashuupulwa okwa popi woo kutya aanona mboka yendji oya li ya pewa iilonga ihe oya dhigipo iilonga yawo omolwa omatompelo oyendji mwakwatelwa okwaahavula iilonga oshowo okwaahena omikalo mwakwatelwa okulongitha nayi iikolitha.
Aanyasha mboka oya pula opo Kashuupulwa a ye moonkundathana nOmukwatakanithi gwOngundu yoSwapo moshitopolwa Erastus Kapolo opo ya vule okumona omeya ihe Kashuupulwa okwe ya lombwele kutya inaya uthwa okukala ya unga oontanda dhawo pombelewa dhoka.
“Ompango inayi mu pitika opo mu kale mwa unga oontanda dheni poombelewa dhoSwapo nenge poshiputudhilo kehe shepangelo.”
OSHAKATI PLACIDO HILUKILWA
Category: