Omunamibia gumwe natango ngoka a yi a ka kuthe ombinga mekondjelomanguluko lyaNamibia ihe ina galukila moshilongo pamwe naakwaita yakwawo mo-1989 okwa itsuwa ishewe moAngola omasiku ngaka.
Haiwila Daniel okwa monika komukwanezimo gwe, Ndapewoshali Shikongo, a adhika momukunda Ohaindele tagu adhika mUuninginino wOihole mUumbugantu wOShitopolwa shaCunene moAngola.
Shikongo ngoka e li omunangeshefa gwopetameko, okwa li a yi komukunda Ohaindele onga oshitopolwa she sholweendo lyopangeshefa na okwa tsakaneneko nahekulu ngoka ya kala yiitaala nale kutya okwa hulitha.
Okwa popi kutya Daniel okwa yi muupongekwa moomvula dho-1980 na okwa wayimine oPeople’s Liberation Army of Namibia (PLAN), ihe ina galukila moshilongo pamwe nayakwawo mo-1989 nofamili oyeshi kutha ko kutya ngiika okwa hulithila mekondjo.
Daniel ngoka e li moomvula dho-50 okwa za momukunda Ohangwena ngoka guli moongamba dhondoolopa yaHelao Nafidi.
Konima nkene a yi kombanda okwa monika owala oshikando shimwe momudhongoloko gwaHangwena ta longo onga omukwaita gwoPLAN.
Sho ina galukila kegumbo otwa kala ngaa ta tu pulaapula ihe inatu mona uuyelele washa , na otwe shi kutha ko owala kutya okwa hulitha,” Shikongo ta ti.
Shikongo okwa popi kutya Daniel ota ulike a fa e na uunkundi wopamadhilaadhilo ihe ota yamukula ngaa omapulo gamwe.
“Okwa dhimbululandje na oku shi natango edhina lyandje.”
Ihe nonando ongaaka Daniel okwa tinda okugalukila kegumbo ta popi kutya okwa tila oombulu.
Shikongo okwa popi kutya, Daniel natango oha ende a fa aakwaita na ohaya yanda oku enda moondjila na oha tongolola omainyengo agehe ngoka ta uvu miihwa.
“Onda li nde mu uvithako opo a tuye naye kegumbo ihe sho twa kala twa tegelela oolefa puundingosho wopomukunda ngoka okwa shendje omadhilaadhilo ge na okwa lundilendje kutya ngame onda tumwa koombulu.”
Aakwanezimo yaDaniel oya tseyithila Uuministeli wIipambele yOonakulwa Aakulu, oshowo Ombelewa yaNgoloneya gwaHangwena.
Ngoloneya Usko Nghaamwa okwa popi kutya ombelewa ye otayi ka kwashilipaleka uuyelele mboka na otaku ka katukwa oonkatu kwiikwatelelwa kuuyelele mboka tawu ka monika.
Oshipotha shaDaniel hasho ashike, omukwaita gumwe natango gwoPLAN, John Madume Mbwalala, okwa adhika mUumbugantu waAngola omimvo dha piti.
PLACIDO HILUKILWA
Category: