Gerhard Komeya, 48, ngoka adhipaga omukadhona okwa pewa egeelo opo a kale modholongo uule woomvula 41 oshowo oomweedhi hamano, omolwa iipotha ngaashi edhipago, onkambadhala yedhipago oshowo eyonagulo lyomaliko.
Komeya okwa pewa egeelo lyoomvula 30 modholongo moshipotha shedhipago, oomvula 10 moshipotha shonkambadhala yedhipago oshowo oomvula 2 moshipotha sheuliko omuntu ondjembo, moka omvula yimwe ya kuthwako opo yi endele mumwe negeelo lyedhipago.
Okwa pewa woo egeelo lyoomwedhi hamano omolwa eyonagulo lyomaliko noomwedhi 12 monkambadhala yokuholeka uumbangi nokuya moshipala oshikondo shuuyuki shi longe iilonga yasho.
Komeya okwa monika ondjo moshipotha shedhipago lyaKertu Maria Tunondjambi Sheehama ngoka a dhipagwa momasiku 10,gaSepetemba 2011 momudhingoloko gwaGolgota, mOvenduka.
Omupanguli mOmpangu yoPombanda Naomi Shivute okwa popi kutya, nonando Komeya okwa gandja ombili kofamili yaSheehama, ina ulika olukeno molwaashoka ina zimina ondjo melongo lyoshimbuluma shoka.
Pahapu dhe okwa popi kutya Komeya okwa ningi owala elago molwaashoka shoka osho oshimbuluma shotango a longo na okwa kala nale modholongo uule woomvula ne sho a tegelela epangulo lye.
“Omwenyo ogwa kana nuunona wa nakusa owa thigwa waana yina,” Shivute ta ti kutya Sheehama okwa dhipagwa iipundjamwenye keena sho a ninga.
Shivute okwa popi kutya, Komeya okwa li a pumbwa okukala omugameni gwaanegumbo lye ihe okwe ya pilukilepo ishewe nokulongo iimbuluma mbyoka.
Omupanguli okwa popi kutya ehekeleko ndyoka Komeya a gandja kofamili yaSheehama inali kwatha sha sho a popi kutya eso lye oli li woo ekanitho kuye.
“Ofamili inayi yekwa owala omuholike gwawo ihe nomusilishisho gwawo,” Shivute a popi nomuthindo.
Komeya okwa pula opo ompangu yi mu tume koodholongo dhilwe ihe hamodholongo yaVenduka moka mwa kala hamu longele nakusa, nomupanguli okwa popi kutya kashi shi etokolo lyompangu okutokola kutya nakumonika ondjo ota falwa kodholongo yinipo.
OVENDUKA FRED GOEIEMAN
Category: