Omunapolotika omukulukulu gwoDTA Katutire Kaura, okwa ulikwa kOmupresidende Hage Geingob oshiwike shika opo a kale omugandjimayele gwaNgoloneya gwaKunene Angelika Muharukua, kiikumungu mbyoka ya guma Onooli yoshitopolwa shoka.
Kaura ota wayiminwa kuJohn //Khamuseb, ngoka taka kala noshinakugwanithwa shokugandja omayele kungoloneya mUumbugantu woshitopolwa. Etseyitho ndyoka olya ningwa kOmupeha Presidende gwoshilongo Nickey Iyambo.
Kaura monena otaka kala ta gandja omayele kungoloneya moshitopolwa shoka sha kala naayambidhidhi oyendji yongundu yoDTA, sho kuna owala iiwike iheyali opo ku ningwe omahogololo gomalelo goondolopa niitopolwa.
“Ondi wete kutya euliko olya hwahwamekwa kopolotika, ye Geingob andola okwa ulika Kaura a ninge nando ongoloneya nenge omukalelipo gwoshilongo nokumupa opoosa ndjoka yi na oonkondo,” Venaani ta ti.
Venaani okwa popi kutya ongundu yawo inayi haluthwa ketokolo ndyoka molwaashoka kali na oonkondo dha sha na itali ka guma onkalo kutya DTA oku na aayambnidhidhi oyendji moshitopolwa shoka.
“Kandi wete twa limbililwa keuliko ndyoka. Tse otwa kola nomahwahwameko getu oga kola noonkondo. Otatu ka tseyithwa woo ehengumukilo lyetu mumwe noUDF moshitopolwa. Tse inatu limbililwa,” Venaani ta ti
Omupopiliko gwomupresidende gwoNudo, Joseph Kauandenge, okwa popi kutya euliko lyaKaura oli li oompangela dhokusindanapo oshitopolwa shaKunene.
Omutseyinanwa gwopolotika Nico Horn okwa popi kutya euliko lyaKaura kali na sha nopolotika.
“Shoka otashi hokitha momayambulepo gopolotika molwaashoka otashi ulike kutya Omupresidende okwa taaguluka oongamba dhopolotika nokuninga omupresidende gwa kehe gumwe,” Horn ta ti.
Horn okwa tsu omuthindo kutya Kaura ke na omungo omunene gwopapolotika kongundu yoDTA, onkene euliko lye ka li li uupyakadhi kOngundu yoDTA.
“Omaiyuvo gandje ogeli kutya konima yehogololo lyaVenaani onga omupresidende gwongundu oye ya pamwe ishewe omanga omahogololo gaayehe ngoka ga ningwa omvula ya piti inaga ningwa na ka pwali shoka tashi ulike kutya oku na ehalo lyokudhigapo ongundu. Ka li eshongo kongundu. ODTA inayi koka unene ngaashi sha li sha tegelelwa kohi yelelo lyaVenaani na ondi inekela kutya omahwahwameko gopapolotika gaKaura kage na oonkondo unene kakele ongele a tseyitha kutya ota wayimine oSwapo.”
Horn oku na omaiyuvo kutya euliko lyaKaura inali kwatakanithwa neyambidhidho lyoDTA moKunene.
“Kaura okwa dhana onkandangala onene moDTA naashoka otashi ulike kutya Geingob ota kwatakanitha iitayi ye noongundu dhopopolotika. Otwa mono nkene a yi mooonkundathana niilyo yoAffirmative Repositioning (AR) otwa mono nkene Hidipo Hamutenya a shuna koSwapo nomonena euliko lyaKaura.”
Konima owala Kaura sho uulikwa okwa popi kutya ye omupiya gwoshigwana.
“Onda ulikwa kOmupresidende opo ndi gandje ekwatho kaakwashigwana yaNamibia. Onda ulikwa sho ndi wetike kutya ngame omuntu ngoka tandi vulu okuninga omalunduluko,” Kaura ta ti.
Okwa nyana noku ekelahi omapopyo kutya euliko lye olya hwahwamekwa kopolotika.
ELVIS MURARANGANDA
Category: