Ongundu yoRally for Democracy and Progress (RDP) oya pula ngele Omupresidende Hage Geingob ota popile onkundana kutya aakwanezimo yaNgoloneya nale gwaHardap, Katrina Hanse-Himarwa otaya iyambapaleke.
Shoka osha landula onkundana ndjoka ya piti miifonkundaneki kutya Hanse-Hiarwa ngoka monena e li Ominista yElongo ota dhana onkandangala miipotha yuulingilingi.
Otaku popiwa kutya okwa gwedha momusholondondo gwaantu mboka ya mono omagumbo mOpoloyeka yEtungo lyEhwata lyOmagumbo moMalinda aakwanezimo ye. Omagumbo ngoka ga thika po-40 oga gwandja kooyene muDecemba gwomvula ya piti.
Amushanga gwomauyelele moRDP, Nghiningilwandubo Kashume, okwa popi kutya otashi limbililike nokuuvitha nayi kutya yaali yomwaamboka yali ya nuninwa omagumbo ngoka oya kuthwamo momusholondondo molwaashoka oyeli aayambidhidhi yoongundu dhompilameno.
“Okukala oshilyo shongundu yompilameno itashi ti kutya ngoye kushi Omunamibia. Kaye shi aazaizai. Mbela omuleli gwoshilongo ota tsu tuu kumwe nomaihumbato gaHanse-Himarwa, nonando omuleli okwa popi kutya kape na Omunamibia ta patelwa pondje.”
RDP okwa pula opo aaleli mboka taya ihumbata momukalo ngoka ya hulithepo uukwamuhoko nuukombunda opo owala oshilongo tashi vulu okuhuma komeho.
Kuyele miikundaneki omwa holoka onkundana ndjoka tayi pula kutya osha ende ngiini opo omumonamati gwaHanse-Himarwa omunamimvo 24, Denzil Hanse a tulululwe mofaalama.
JEMIMA BEUKES
Category: