Omupanguli Christie Liebenberg, okwa mono ondjo omunamimvo omi-23
Jeffrey Barman omolwa oshipotha shedhipago lyomukadhona gweMelanie Booysen.
Barman okwa tsu Booysen mothingo nekende lya tatuka.
“Omuntu ngoka a monitha nakusa oshiponga omolwa omaihumbato ge omawinayi ngoka ga fala meso lyanakusa ongoye awike. Owa ponokele nakusa nekende lya tatuka, shoka owe shi ningi nelalakano opo wu mu dhipage,”Omupanguli Christie Liebenberg ta ti
Uuyelele mboka gwa gandjwa otawu popi kutya, Melanie Booysen okwa tsuwa mothingo momasiku 10 gaNovemba, 2012, sha ningilwa mehala lyomagumbo moGolgota, pethimbo lyoshituthivalo shokanona kawo kokakadhona.
Oshiningwanima shoka osha ningilwa konima yegumbo, sha ningilwa miipathi yayina yanakusa, Susanna Booysen, Ivan Hamaseb, Getruida (Heidi) Barman.
Konima sho a tsuwa nakusa okwa kambadhala okuya ontuku uuka keelo lyegumbo ihe okwa hulitha molwaashoka okwali ta zi ombinzi oyindji.
Okuza mpoka Barman, okwa hingi ohauto ye nokwe yi dhenge mekuma lyegumbo li li popepi negumbo lyayina. Sho opolisi ye ya tayi mukongo megumbo lya yina, okwa londo pombanda yiipeleke yegumbo lyamushiinda shawo. Sho a lombwelwa kopolisi opo a ze po okwiiyumbupo pombanda sha etitha opo a teye okugulu kwe.
Moshipotha shedhipago sho a kala ta tamanekelwa kwiikwatelelwa kOmpango yOkukondjitha Iimbuluma yOmomagumbo, Barman okwa monika ondjo moshipotha shedhipago lyomukadhona gwe omunamimvo 20, sho e mu tsu nekende mothingo.
Okwa monika woo ondjo miipotha yeehameko iyali, sho uundulile modhalate Susanna Aletta Booysen. Okwa zimine ondjo moshipotha shoka.
Okwa zimine woo mompangu momasiku 18 gaMei nuumvo kutya okwa dhenge woo nokweehameka omumwayinagona, Albertus Fransiscus Duncan momasiku 9 gaAguste mo-2013.
Barman ina monika ondjo moshipotha shonkambadhla yedhipago oshowo okweehameka omumwayinamati gwomukadhona gwe, Charlton Swartz, ngoka a tsuwa nekende moshipala konima sho Barman a dhipaga omukadhona gwe.
Barman ina monika ondjo sho a tsu nombele omumwayinagona, Albertus Fransiscus Duncan, momasiku 9 gaAguste mo-2013.
Omufali gwiihokolola kompangu, Zimba Nduna okwa kalelepo epangelo moshipotha omanga Willem Visser a kalele po paveta omupangulwa.
OVENDUKA FRED GOEIEMAN
Category: