Omukomeho gwaNamfisa a hulithile moshiponga shohauto

Eso lyombaadhilila lyOmunambelewa Omukuluntu gwehangano lyoNamibia Financial Institutions’ Supervisory Authority (Namfisa) , Phillip Shiimi, olya e ta oluhodhi olunene moshilongo.
Shiimi okwa hulitha ongula yOlyomakaya moshiponga shi nyanyaleka shoka sha ningilwa pokati kondjila yaTjiwarongo naTavi. Omukulukadhi gwe okwa hupu moshiponga na okwa lalekwa okuza moshipangelo mehuliloshiwike.
Pauyelele mboka wa gandjwa kopolisi yaTjozondjupa, ohauto yaShiimi yoToyota yiikoto iyali oyiidhenge meleli ndyoka lya li lyina uupyakadhi mondjila ndjoka yoB1.
Otaku hokololwa kutya Shiimi okwiidhenge mokatemba keloli hoka ombinga yimwe yako yali mopate. Oshiponga osha holoka lyopotundi 05:30.
Aanamibia oyendji oya longitha omapandja gomakwatathano gopainternet okuulika oluhodhi lwawo nokugandja omahekeleko kofamili yaShiimi. Momukanda ngoka gwa pitithwa, omunashipundi gwelelo lyoNamfisa, Estelle Tjipuka, okwa popi kutya oshigwana shaNamibia osha kanitha omuleli omuwanawa.
“Mboka ya ningi elago nokulonga pamwe nanakusa oya kanitha kuume kawo oshowo omugandjimayele nomuleli gwopashigwana.”
Omukomeho gwehangano lyoOxygen Communications, Hilda Basson-Namundjebo, okwa hokolola Shiimi kutya okwa li omuntu omuwanawa.
“Otandi popi uukwashili mpaka kutya, ndika ekanitho enene kungame. Otwa topolelathana uuyelele nokukundathana kombinga yiikumungu oyindji. Hamasiku ogendji ga piti sho twa popi kombinga yiikumungu ya yooloka mbyoka ya taalela oshigwana ngaashi evi, oofamili oshowo ekwatathano lyetu naKalunga. Otandi gandja omahekeleko gandje kaaholike ye,”Basson-Namundjebo ta ti.
Omupopiliko gwoNamfisa, Isack Hamata, okwa popi kutya Shiimi kali owala ependafule ndyoka lya ningi omalunduluko ga yooloka moNamfisa, ihe omoshikondo ashihe shemona.
Okwa popi kutya Shiimi, ngoka a wayimine Namfisa omimvo 6 dha piti okwa kala e na omaipulo ogendji kombinga yoshikondo shiiyemo kombinga yaayakulwa. “Okwa li e na ohokwe yokuninga omalunduluko omanene moshikondo nokugandja ompito ombwaanawa negameno kaayakulwa yoshikondo.”
Okwa gwedha po kutya Shiimi okwa li woo e na oshipwiyu naaniilonga ye.
“Aluhe okwa kala omutango mombelewa na okwa kala omuhugunini mombelewa.”
Omanga ina longela Namfisa, Shiimi okwa li omudhiginini gwiiniwe moFirst National Bank na okwa longela woo oBank of Namibia.
OVENDUKA GORDON JOSEPH