Londrino Zeferino Ndumbo okwa tindi okuza megumbo lye molwaashoka oshimaliwa shooN$407 000 shoka ta futwa opo a dhigepo egumbo lye oshowo ehanagulo po lyegumbo lye ineshi pendula.
Omulumentu ngoka okwa kuthwa megumbo lye koonkondo, konima yoomvula sho a tindi okuthiga po egumbo lye opo a gandje ompito komayambulepo gOndoolopa yaNdangwa. Ndumbo okwa tindi okuthiga po ehala lye molwaashoka oshimaliwa shoka ta futwa oshishona.
Omutumwa gwompangu, John Puleston okwa thiki mOlukanda Omashaka mOndangwa mEtiyali nokutula miilonga omukanda gwekutho po koonkondo kuNdumbo.
Ndumbo okwa li a pewa elombwelo opo adhigepo ehala ndyoka oshiwike sha piti ihe ina tula miilonga elombwelo ndyoka a pewa.
Ndumbo ota pula opo a futwe oshimaliwa shomiliyona yimwe omolwa evi lye ndyoka ta kuthwa oshowo omolwa omatungo ge gaali ngoka gena oondunda ne mukehe.
“Aantu ayehe taya adhika pehala ndika momasiku ga8 gaSeptemba, 2015 potundi 8:00 otaya ka kuthwa po koonkondo ngaashi tashi uthwa kelombwelo lyOmpangu yoPombanda yaNamibia. Opo wu yande omaliko goye ga tulwe momapandanda nenge pehala limwe oto indilwa opo wu iyuthe kelombwelo ndika,” omukanda ngoka gwa lesha.
Momaandaha natango omutumwa gwompangu okweya yemwene na okwa gandja ekunkililo kuNdumbo adhigepo ehala ndyoka nenge a kuthwepo koonkondo esiku lya landula.
Ndumbo ngoka a li a ngwangwana noonkondo okwa popi tati. “Otandi yi peni ngele nani inandi futwa. Onda lombwela omutiligane ngoka kutya kandi na mpoka tandi yi molwaashoka ngame inandi futwa, ihe nena okwa galuka e li naaniilonga oshowo aapolisi yatatu naanambelewa yamuni. Oya tameke taya hanagulapo egumbo lyandje nokukuthamo iinima yandje,” Ndumbo ta ti.
Omakuma ge oga hanagulwapo nomaliko gaakwanezimo. Omakumba gomiyelo oga tewapo oshowo iimbeleki mbyoka ya li ya ninga ongalashe.
Ooskopa, iitaafula niipundi oya ekelwahi pondje. Ofamili ndjoka yaantu yaheyali oya lala pondje molwaashoka oya popi kutya kayi na mpoka tayi yi. Na oya kunkililwa opo kaya lyate ompadhi pehala mpoka pwali egumbo lyawo.
Ndumbo ngoka e li omukwashigwana gwAngola ihe okwa kala moNamibia uule woomvula 20 dha piti, okwa hokana Omunamibia na okwa holola kutya ehanagulepo lyegumbo lye olya ningwa molwaashoka keshi Omunamibia.
“Sho ye ya mpaka oya kala taya popi kutya ngame omuzaizai. Nani aazaizai kaye na uuthemba nomaliko gawo otaga vulu owala okuhanagulwapo.”
Ndumbo okwa popi kutya oshimaliwa shooN$407 000 shoka ta pewa kelelo lyaNdangwa inashi gwana okutunga olukalwa lwe pamwe nomukulukadhi ge oshowo oyana yatano.
“Tse katu li ompinge neyambulepo ihe otwa hala owala okufutwa pauyuuki. Oya pumbwa okutupa ethimbo opo tu tunge egumbo lyetu limwe opo owala taya vulu okutu tidha.
Sho ya ningilwa omapulaapulo, aanambelelwa yElelo lyaNdangwa, oya popi kutya oya yi kompangu opo ya ka pewe ekwatho lyokugandja omukanda gwekuthopo lyaantu mboka ihe momukalo ngoka ekuthopo ndyoka lya ningwa itali pelwa elelo lyaNdangwa.
“Ndumbo okwa tindi okuthigapo ehala ndyoka nokutamba iimaliwa mbyoka ta pewa mo-2013. Kashi shi kutya inatu hala okumu futa ihe oye a tindi okufutwa,” Simon Shinguto gwElelo lyaNdangwa ta ti.
Shinguto okwa popi kutya aantu ohaya futwa kwiikwatelelwa komulandu gwokufuta aantu mboka taya kuthwa pomahala gawo omolwa omayambulepo oshowo pakumeta ongushu yomaliko gawo na itaya vulu okuninga omalundululo momulandu ngoka.
Okwa ti, Ndumbo ota vulu okufutwa uuna a shaina omikanda dhoka a tindi okushaina.
ONDANGWA PLACIDO HILUKILWA
Category: