Uulalelo wowina wa nuninwa omauliko giipindigonuumvo mondoolopa yaNdangwa owa gongele oshimaliwa sha thika pooN$441 571.
Oshituthi shoka sha ningwa mOlyomakaya ga piti osha mono nkene aanangeshefa, aakalelipo yomahangano naakwashigwana ya gongele iimaliwa mboka ya nuninwa omauliko giipindi omatihamano mondoolopa ndjoka.
Omauliko ngoka okwa tegelelwa ga kaleko pokati komasiku 29 gaApilili sigo ga7 gaMei.
Omupevi omupresidende, Nickey Iyambo, ngoka ali gumwe gwomaayenda mboka ya kala puulalelo mboka okwa gandja oshimaliwa shoN$5 000.
Yamwe mboka ya gandja iimaliwa oyindji ongaashi John & Penny Group of Companies (N$60 000), Chicco Group of Companies (N$50 000), First National Bank Namibia (FNB) (N$40 000), Air Namibia (N$25 000), Old Mutual Namibia (N$15 000), Oshakati Premier Electric (N$15 000) noShilitech Group (N$10 500).
Iyambo okwa popi nkene ondungethaneko yoHarambee Prosperity Plan (HPP), ndjoka yili oshiyetwapo shomupresidende Hage Geingob, tayi vulu okwaadha omathikilo okupitila momauliko giipindi goludhi ndoka.
Iyambo okwa pandula elelo lyondoolopa yaNdangwa ndjoka a popi kutya oyi li ondoolopa tayi kokelele pangeshefa na otayi nana aapunguli.
Mayola gwondoolopa ndjoka, Paavo Amwele okwa popi kutya elelo lyawo olyiitulamo mokukwashilipaleka kutya otaya gandja omudhingoloko omuwanawa gwaanangeshefa.
Amwele okwa popi kutya ehala mpoka tapu ka ningilwa omauliko ngoka olya tungwa nale miitopolwa itatu noshitopolwa shotango osha manithwa na osha koho oshimaliwa shoomiliyona 14.
Patrona gwomauliko ngoka, John Akapandi Endjala, okwa longitha ompito ndjoka opo a pule uukumwe mokati kaanangeshefa opo owala ya vule okuyambulapo ongeshefa.
KENYA KAMBOWE