Omaindilo ngoka oga holoka sho kwa lyatwa ishewe okanona kokamati koomvula 8 mondjila ndjoka mEtitano lya piti.
Layan Muskwei, okwa pumwa koshiyenditho omutenya gwEtitano na okwa hulitha ongulohi ndjoka. Nakusa okuli omuntu omutiyali ta monene oshiponga nokuhulitha mondjila ndjoka okutameka muFebruali nuumvo.
"Otwa pumbwa omalamba nomainda gondapo mondjila ndika. Oshipu oku uva ihe oshidhigu uuna wa mono nkene oshiponga shoka tashi ningwa nongele wushi nakuninga oshihakanwa," gumwe gwomwaamboka ya mono nkene oshiponga shoka sha ningwa ta ti.
“Onkalo odhigu noonkondo. Oshinima shoka osha ningwa meendelelo. Onda li owala nda ithana okanona hoka molwaashoka oka pitipo putse natate gwako na ohaya yi koskola yimwe nokanona kandje, omanga inaya taaguluka ondjila. Onda uvu oshinima shiinyenge na onda li ndi shi ombwa ya pumwa ihe onda mono he yokanona ta tondokele kolutu lwokanona ndoka lwa lala oshinano shoometa 30. Ondi mu shi."
Aakwashigwana oya popi kutya okanona kamwe natango oka lwatelwa pehala ndyoka muFebruali.
Aantu oyendji oya mbombolokele pehala lyoshiponga na oya popi kutya oomwenyo dhaakwashigwana odhili moshiponga.
Ondjila ndjoka oya pita pomagumbo, oongeshefa oshowo oskola yaOngwediva Junior Secondary School, ongeleka yaEvangelical Lutheran Church oshowo ehala lyaakokele lyokukwatela openzela.
Sho a ningilwa omapulaapulo, Omunambelewa Omukuluntu gwondoolopa yaNgwediva, Damian Egumbo, okwa popi kutya yo otaya vulu owala okulonga nomalamba na ogeli ihe omainda gondapo oge li oshinakugwanithwa shoRoads Authority (RA) .
Egumbo okwa pandula woo oonkambadhala tadhi ningwa kaanambelewa yekalekepo lyelandulathano noompangu dhomoondjila na okwa gandja uusama kaahingi mboka itaya landula omilandu kutya oyo taya etitha iiponga.
KENYA KAMBOWE
