Omunashipundi gwoEstate Agents Board of Namibia, Anne Gebhardt, okwa popi kutya kape na ngoka e na ekondololo ke yo pombanda lyondando yomagumbo moshilongo.
Gebhardt okwa popi kutya omukundu ngoka otagu etithwa kompumbwe yomagumbo oshowo komuyalu omunene gwaantu mboka ya hala omagumbo. Okwa popi kutya aalandithi yomagumbo otaya dhana onkandangala oshona ngetashiya koondando dhoka naadhani nkandangala yamwe omwa kwatelwa aalandithi yomagumbo pakutala kwaangoka e na oshimaliwa oshindji oshowo aakonaakoni yongushu yomagumbo.
Oshiwike shika sho aaleli yehwahwameko lyoAR ya tsakanene nomupresidende oshowo aaleli mokabinete koshilongo oya a dha etsokumwe opo ku tulwe miilonga olutu lwokukondolopa oondando dhomagumbo.
Omunashipundi ngoka okwa popi kutya ombaanga oyo hayi konaakona ongushu yegumbo na oyo yi na etokolo lya hugunina.
Omutumba ngoka ogwa pula opo Omprima Saara Kuugongelwa-Amadhila iithane komutumba elelo lyaalandithi yomagumbo omanga esiku lyotango lyaAguste inali thikana.
Nonando ongaaka aalandithi yomagumbo mboka inaya hala okuholola uukwatya wawo oga gandja uusama kaatungi noombaanga.
Oya popi kutya ethimbo limwe oombanga ohadhi tula ongushu pombanda shoka osho hashi falitha ondando pombanda naamboka haya ningi iihakanwa ye yo pombanda lyoondando dhoka, aakwashigwana mboka ya pumbwa omagumbo.
Oya popi kutya uulingilingi nawo otawu dhana onkandangala sho aatungi yamwe aniwa haya gandjapo omahala gamwe koomenindjela yoombanga kondando yopevi opo ya kwashilipaleke kutya omahala ngoka oga pewa ongushu yopombanda.
Oya popi kutya ethimbo limwe omuntu oha kala a hala okulanditha po egumbo lye koshimaliwa shooN$900 000 niimaliwa mbyoka oyindji noonkondo okutala kongushu yegumbo, ihe aalandithi ohaya gwedhako owala okomisi yawo nokulanditha po egumbo ndyoka omolwa uutile wokukanitha okastoma na ihaya popi oshili kutya ongushu yegumbo oyi li pevi okuyeleka noshimaliwa.
"Itatu longo aalandithi kutya omagumbo itaga vulu okulandithwa kondando yili pombanda noonkondo omanga ongushu yago yili pevi."
Gebhardt okwa tsikile kutya, okulongitha omuntu omutitatu momatsokumwe nasho ohashi ningitha ondando yi londe pombanda molwaashoka aalandithi ihaya hala ya topole okomisi yawo nomuntu omutitatu nopehala ohaya gwedhele owala ondando yomagumbo opo omutitatu ngoka a vule okumona iifuta ye okuza kondando yegumbo.
“Omulandithi gwomagumbo gumwe a ningwa naye oonkundatha koNamibian Sun okwa popi kutya ondando yomagumbo otayi limbililike ashike ihe Elelo lyAalandithi yOmagumbo kali na shoka tali vulu okuninga po.
Omulandithi ngoka naye okwa gandja uusama koombanga, ta ti epangelo nali tameke okupula oombanga.
GORDON JOSEPH