Oompangela dhokushunitha pevi ondando yevi nomagumbo mOmbaye, otadhi tulwa miilonga.
Aanapolotika naMuni gwondoolopa ndyoka otaya ka kongo omukalo opo ku gandje omagumbo yondando yopevi.
Pehala lyokukuta miilonga omahangano galwe gokuwapaleka omahala nokutunga omagumbo,aaningi yomaindilo gevi oyo taya ka longa yoyene iilonga mbyoka.
Ngoloneya gwErongo, Cleophas Mutjavikua okwa lombwele oNampa kutya okwa nyanyukwa sho oompangela dhokushunitha pevi ondando yomagumbo dha tulwa miilonga nuumvo.
"Epangelo, oshikondo shopaumwene naanangeshefa oohandimwe otaya ka gandja evi, omashina gokuninga oodhopi iitungithi kaakwashigwana mboka ya hala okutunga omagumbo gawo yoyene."
Okwa popi kutya okugandja ooplota kaantu mboka ya hala okutunga oombashu nokutegelela ya tungilwe omagumbo gomakuma itashi ka longa.
Pahapu dhaMutjavikua, aantu mboka kaye na evi mOmbaye oya holola ohokwe kutya otaya vulu okutha omalambo gominino dhiiyekelwahi, okuninga oodhopi nokuya mbidhidha metungo lyomagumbo gawo.
Itatu ka longa noombashu.
Ominista yEyambulepo lyOondoolopa nOmikunda, Sophia Shaningwa okwa li a ningi oshigongi naakwashigwana mOmbaye nokukundathana oshikumungu shevi sha landula sho oofamili dha thika po-22 dha kuthwa pehala lyepangelo momudhingoloko gwaTutaleni iiwike iyali ya piti.
Onkalo ndjoka oyali ya shituka iikolokosha nopolisi oyali ya ithanwa.
Okwa pula aakwashigwana yiidhidhimike nokuhulithapo omukalo gwokwiikuthila evi nokulwitha opolisi.
Pethimbo kwa ninga oonkundathana naMuni oshiwike sha piti, okwa adhika etsokumwe opo ku gandjwe ooplota dha thika po-1000 kaakwashigwana mOmbaye meendelelo.
Ope na woo oshikumungu shaakiintu naanona mboka kaye na mpoka taya yi konima sho ya tidhwa pehala lyepangelo moTutaleni.
Okwa hogololwa ongudu ndjoka tayi ka tala kutya openi taya vulu okutulululwa.
Omunambelewa Omukuluntu gwOndoolopa yaMbaye, Muronga Haingura, okwa lombwele Nampa kutya oshikumungu shoka natango otashi kundathanwa.
"Kashi shi oshinima oshipu. Inatu vula okumona ekandulepo lyomukundu ihe otatu kundathana opo tu kandulepo omukundu ngoka."
NAMPA